पोखरा । गण्डकी मेडिकल कलेज तनावग्रस्त बनेको छ । कलेज प्रशासनले विद्यार्थीबाट अनधिृकत रुपमा असुलेको लाखौँ रुपैयाँ फिर्ता पाउनुपर्ने मागसहित आन्दोलनमा उत्रेका विद्यार्थीले लगाएको ताला प्रहरीले खोलेपछि अस्पताल परिसरमा अहिले नाराबाजी भइरहेको छ । प्रहरीले जबर्जस्ती रुपमा ताला खोलेको उनीहरुको आरोप छ । आक्रोशित विद्यार्थीहरुले फेरि ताला लगाउन खोजेपछि स्थिती तनावग्रस्त बनेको हो ।

आक्रोशित विद्यार्थीहरुले तालाबन्दी गर्न खोज्दा प्रहरीले रोक्न खोजेपछि केहीबेर धकेलाधकेल समेत भएको छ । नर्सिङकी एक विद्यार्थी रविना मिश्र ईमरजेन्सीमा भर्ना भएकी छन् । प्रहरीले छातीमा हानेको उनले बताईन् । तर, प्रहरीले भने विद्यार्थीहरुलाई केही नगरेको दाबी गरेको छ ।

अस्पताल परिसरमा ठूलो संख्यामा नेपाल प्रहरी र सशस्त्र प्रहरीको उपस्थिती छ । कलेज प्रशासनले माग सुनुवाई नगरेको भन्दै विद्यार्थीहरुले कलेजको ओपिडी, ईसिएचएस, बिलिङ काउण्टर बन्द गरिदिएका थिए । तर, प्रहरीले सोमबार बिहान विद्यार्थीहरु आईनपुग्दै ताला फुटाएको छ ।

उनीहरुले बिलिङ काउण्टर पुनः बन्द गरिदिएका छन् । आक्रोशित विद्यार्थीको भिडले अस्पतालभित्रै नाराबाजी गर्दै कलेज प्रिन्सिपल र मेडिकल सुपरिटेन्डेन्टको राजीनामा समेत माग गरेका छन् ।

विद्यार्थीहरुको आन्दोलनको आज २६ औँ दिन पुगेको छ । यस्तै, रिले अनसनको १६ औँ दिन पुगेको छ । कलेज प्रशासनले माग पुरा नगरेसम्म आन्दोलन फिर्ता नलिने उनीहरुको भनाइ छ । विभिन्न चार बुँदे मागसहित आन्दोलनरत ८३ विद्यार्थीहरुले एमबिबिएसको परिक्षा समेत दिएनन् ।

विद्यार्थीहरुले सामाजिक सञ्जाल फेसबुकमा जिएमसी सोलिडारीटी फर जस्टिस पेज बनाएर आन्दोलनमा सहयोगको आह्वान समेत गरेका छन् । 

सामाजिक सञ्जालमा राखिएको एक तस्बिर अनुसार २०१५ यताका ५१२ जना विद्यार्थीहरुबाट कलेज प्रशासनले ५१ करोड रुपैयाँ बढी शुल्क उठाएको उल्लेख गरिएको छ । एमबिबिएस, बिडिएस, बिएमएलटी, बिएमआईटी, बिएनएस, बिएस्सी नर्सिङ, फार्मेसीमा अध्ययनरत विद्यार्थीहरुबाट उक्त रकम उठाइएको विद्यार्थीहरुको आरोप छ । मनपरि रुपमा लिएको शुल्कको रसिद समेत कलेज प्रशासनले नदिएको आरोप उनीहरुको छ । खाली स्लिपमा हस्ताक्षर गरेर रकम बुझेको भन्दै जिल्ला प्रशासन कार्यालयमा समेत विद्यार्थीहरुले प्रमाण पेश गरेका छन् ।

यस्तै, पूर्ण छात्रवृत्तिमा अध्ययन गर्न आएका विद्यार्थीहरुबाट पनि कलेजले विभिन्न शिर्षकमा रकम उठाउने गरेको आरोप विद्यार्थीहरुको छ ।

बैदाम प्रहरी कार्यालयका डिएसपी कोमल शाहले कलेज प्रशासनकै रोहबरमा ताला खोलिएको बताए । ‘अति आवश्यक सेवा पनि बन्द भएका कारण कलेज प्रशासनको रोहबरमा ताला खोलेका हौँ’ उनले भने ।

तर, विद्यार्थीहरुले ईमरजेन्सी सेवा भने बन्द गरेका छैनन् । कलेज प्रशासनले केही दिन अघि सञ्चारमाध्यममा सार्वजनिक आह्वान भन्दै ईमरजेन्सी सेवा पनि बन्द भएको सूचना प्रकाशन गरेको थियो ।

अनुगमन समितिले के गर्दैछ ?
विद्यार्थीहरुको आन्दोलन चर्किँदै गएपछि गतसाता त्रिविले अनुगमनको लागि ३ सदस्यिय टोली खटाएको थियो । टोलीका संयोजक डा. ओमप्रसाद बरालले विद्यार्थी र कलेज प्रशासनसँग आवश्यक डकुमेन्ट लिईएको र अध्ययन गरिरहेको बताए ।

‘डकुमेन्ट लिएर आएका छौँ, अध्ययन गर्दैछौँ, त्यसको प्रतिवेदन बन्छ, प्रतिवेदन सत्यतथ्य हुन्छ कसैको पक्षविपक्षमा हुँदैन,’ उनले भने, ‘प्रतिवेदन हामीले कार्यकारी परिषदमा बुझाउँछौँ, त्यसले कार्यान्वयन गर्छ ।’

विद्यार्थीले दिएको प्रमाण र कलेजको विवरण अध्ययन गर्ने र प्रतिवेदन बनाईने उनले जनाए । निश्चित समय नभएतापनि जतिसक्दो चाँडो प्रतिवेदन तयार पार्न आफूहरु लागिपरेको उनले जनाए । 

प्रतिवेदन विद्यार्थीले मान्नेमा आशंक छ नि भन्ने प्रश्नमा उनले भने, ‘कार्यकारी परिषदमा बुझाएको प्रतिवेदन गलत भएको खण्डमा हामीहरु पनि तानिन्छौँ, कसैको पक्षविपक्षमा लागेर प्रतिवेदन आउँदैन, प्रतिवेदन चित्त नबुझे विद्यार्थीहरु अदालत सम्म जान सक्छन् ।’