काठमाडौं ।  सडकमा जथाभावी सवारीसाधन रोकेर यात्रु चढाउने सार्वजनिक यातायातका चालक र जेब्राक्रसबाहेक अन्य ठाउँबाट बाटो काट्ने यात्रुलाई पनि अब कारवाही गरिने भएको छ ।

जथाभावी बाटो काटे पाँच सय जरिबाना तिनुपर्ने ट्राफिक प्रहरीले जनाएको छ । 

ट्राफिक प्रहरीले आईतबारदेखि यस्तो व्यवस्था गर्न लागेको हो । महानगरीय ट्राफिक प्रहरी महाशाखाले आईतबार देखि सडकमा चल्ने सम्पूर्ण सवारी साधन र सडक प्रयोगकर्तालाई जेब्राक्रस र ‘बस स्टप’ का बारेमा चेतना दिने जनाएको छ । ट्राफिक महाशाखा प्रमुख डीआईजी प्रकास अर्यालले भने,“सडक दुर्घटनाको मुख्य कारण नै बटुवाले जेब्राक्रसको प्रयोग नगर्नु र चालकले जथाभावी सडकमा यातायात रोक्नु नै हो । त्यसैले जथाभावी बाटाे काट्नेलार्इ पनि कारवाहीकाे व्यवस्था गर्न लागेका हौं ।”

सडक दुर्घटना न्यूनिकरण गर्न यी दुई विषयलाई ध्यान दिनुपर्ने उनको भनाई छ ।

डीआईजी अर्यालका अनुसार बाटो हिँड्ने बटुवाले पनि जेब्राक्रस प्रयोग नगरी जथाभावी सडक पार गर्नाले दुर्घटना हुने गरेको छ ।  “आइतबारदेखि जेब्राक्रसबाट मात्र सडक पार गर्नुपर्नेछ,” अर्यालले बाह्रखरीसँग भने,“होइन भने जथाभावी सडक पार गर्नेलाई नियन्त्रणमा लिएर ट्राफिकले कारवाही गर्नेछ ।”

पहिलोचरणमा एकसातासम्म सचेत गराउने योजना ट्राफिक महाशाखाले अघि सारेको छ । त्यसपछि जेब्राक्रस प्रयोग नगरी बाटो काट्ने यात्रुलाई पाँच सय जरिबाना र एकघण्टा ‘क्लास’ लिने डीआईजी अर्यालले जानकारी दिए ।  त्यसैगरी उपत्यकाभित्र चल्ने सम्पूर्ण सवारी साधनले यात्रु ओराल्दा तथा चढाउँदा अनिवार्य रुपमा तोकिएको ठाँउमा मात्र रोक्नुपर्नेछ ।  उपत्यकामा एकवर्षको अवधीमा सडक दुर्घटनामा परी १ सय ६६ जनाको मृत्यु भएको छ ।  त्यसमध्ये ४० प्रतिशत पैदलयात्रुको मृत्यु भएको प्रहरीले जनाएको छ । पैदल यात्रुले पनि जथाभावी सडक पार गर्दा यस्तो दुर्घटना हुने गरेको प्रहरी निष्कर्ष छ ।