Skip Advt.

खेल

विश्वकपको लागि ब्राजिलको टोली घोषणा, घाइते नेयमार टिममा अटाए

विश्वकपको लागि ब्राजिलको टोली घोषणा, घाइते नेयमार टिममा अटाए

एजेन्सी । ब्राजिलले रुसमा हुने फिफा विश्वकप फुटबलको लागि राष्ट्रिय टोलीको घोषणा गरेको छ । जेठ अन्तिम साताबाट सुरु हुने विश्वकप फुटबलको लागि ब्राजिलले सोमबार राति २३ सदस्यीय राष्ट्रिय टोलीको घोषणा गरेको हो ।

ब्राजिलले सार्वजनिक गरेको राष्ट्रिय टोलीमा घाइते रहेका २६ बर्षीय फरवार्ड नेयमार अटाएका छन् ।  फ्रेन्च क्लब पेरिस सेन्ट जर्मेन (पिएसजी)का नेयमार पछिल्लो केहि महिनाबाट मैदानमा नदेखिएपनि प्रशिक्षक टिटेले टोलीमा राखेका छन् । नेयमारले गत फागुनमा मार्सेलीविरुद्धको खेलमा चोट बेहोरेका थिए  ।  तर, यो पटक ब्राजिलको टोलीमा पिएसजीकै डिफेन्डर ड्यानी अल्भेसले भने चोटका कारण टोलीमा परेनन् ।

विश्वकपमा ब्राजिलको फरवार्ड लाइन नेयमारसँगै रोबर्टो फिर्मिनो,ग्याब्रिएल जेसस र टाइसनले सम्हाल्नेछन्  । मिडफिल्डरमा फिलिप कौटिन्हो, पाउलिन्हो,फर्नानडिन्हो, विलियन,क्यासेमिरो, फ्रेड, डग्लस कोस्टा र रेनाटो अगुस्टो छन् ।

त्यस्तै टोलीको डिफेन्स ड्यानिलो, मार्सेलो,थियागो सिल्भा, मार्किन्हस, पेड्रो जेरोमेल, मिरान्डा,  फिलिपे लुइस र फाग्नरले सम्हाल्ने छन् । ब्राजिलियन टोलीको गोलरक्षकमा  एडरसन, एलिसन र क्यासिओ रहेका छन् ।

आगामी जेठ ३१ गतेबाट सुरु हुने २१ औँ संस्करणको विश्वकपमा ब्राजिल समूह ‘ई’ मा रहेको छ । ब्राजिलको समूहमा कोस्टा रिका, सर्बिया र स्विटजरल्यान्ड रहेका छन् । यो  संस्करणको विश्वकपमा ३२ राष्ट्रले प्रतिस्पर्धा गर्दैछन् ।

तपाईंको मत