काठमाडौं । एसडिसी हाउन्ड्स प्रथम मनमोहन स्मृति खुला बास्केटबल प्रतियोगिताको पुरुषतर्फ सेमिफाइनलमा प्रवेश गरेको छ ।
बिहीबार भएको खेलमा आयोजक नेकोसलाई ६८–४५ ले पराजित गर्दै हाउन्ड्सले अन्तिम चारमा स्थान पक्का गरेको हो । हाउन्ड्सको जितमा मनीष केसीले १५ अंक योगदान दिए ।
पहिलो क्वाटरमा १३–११ र दोस्रोमा १६–१५ को सामान्य अग्रता लिएको हाउन्ड्स तेस्रोमा १२–१२ को बराबरीमा रोकिएको थियो । तर, चौथो तथा अन्तिम क्वाटरमा २७–७ को अग्रता बनाउदै हाउन्ड्सले सहज जित दर्ता गर्यो ।
पुरुषकै अर्को खेलमा साउथ साइडर्सले जेभियरलाई ७९–५८ ले हरायो । साइडर्सका लागि विशाल तामाङले २४ अंक जोडे । सुरुवातमा २१–१३ ले अगाडि रहेको साइडर्स दोश्रोमा १७–१९ ले पछि पर्यो । बाँकी दुई क्वाटर आफ्नो पक्षमा पारेको साइडर्सले क्रमशः १८–१३ र २३–१३ अंक जोड्यो ।
चण्डोलस्थित विशाल मिलन केन्द्रको कोर्टमा जारी प्रतियोगिताको महिलातर्फ बुढानीलकण्ठले जित दर्ता गरेको छ । बुढानीलकण्ठले एनसीसीएसमाथि ६२–३२ को सहज जित दर्ता गर्यो । बुढानीलकण्ठकी अनुषा मल्लले १६ स्कोर गरिन् ।