काठमाडौं । नेपाली क्रिकेट टिम यतिबेला विश्वकप छनोटको संघारमा रहेको छ । इतिहास रच्ने दाउमा रहेको नेपाली क्रिकेटलाई विश्वसामु पुनः परिचित हुने मौका आएको छ । 
‘मौका आउछ पर्खिंदैन, बगेको खोला फर्किदैन’ यो उखान नेपाली क्रिकेट टिमलाई लागु हुन्छ, यतिबेला ।

नेपाली क्रिकेटसामु अवसरको ढोका अघि आएको छ । अब त्यो ढोकालाई नेपालले खोल्न सक्छ या सक्दैन ? केही दिनपछि नै थाहा हुनेछ । यद्यपि नेपालले खेल्न लागेको यो प्रतियोगिता अहिलेसम्मकै माथिल्लो स्तरको हो । किनभने यो प्रतियोगितामा ४ टेष्ट नेशन राष्ट्रसहित ४ एक दिवसीय र २ लिष्ट ए का टिम छन् भने आफ्नै समूहमा जिम्बावे र अफगानिस्तान जस्ता टेष्ट नेशन राष्ट्र छन् ।

विभिन्न संकटबाट गुज्रिएको नेपाली क्रिकेटले आयोजक जिम्बावे, अफगानिस्तान, स्कटल्याण्ड र हङकङ जस्ता राष्ट्रलाई पराजित गर्न सक्ला ?

कप्तान पारस खड्का भनेका छन्, “हामी त्यो लेभलमा पुगि सकेका छौ की सजिलो भन्ने कुरा कहि छैन । सबै टिम बलिया छन् ।”

इतिहास रच्ने मौका
नेपाली क्रिकेट महत्वपूर्ण घडिमा छ । आईसीसी विश्वकप छनोटमा सफलता पाए नेपालको आगामी यात्रा निकै सुनौलो छ । विश्वकप छनोटको सुपर सिक्समा पुगे मात्रै नेपालले थुपै्र अवसर प्राप्त गर्ने छ भने नेपाली क्रिकेटको इतिहास त्यसै बन्ने छ । अहिलेसम्म नेपाल विश्वकप छनोटदेखि सुपर सिक्ससम्मको यात्रा तय गर्न सकेको छैन । 

एकपछि अर्को समस्यामा रुमलिएको नेपाली क्रिकेट आफ्नो अभिभावक नेपाल क्रिकेट संघ (क्यान) विनै विश्वकप छनोट जस्तो ठूलो प्रतियोगिता खेल्दैछ । हुन त, अन्य सहभागी ९ राष्ट्रका खेलाडी आफ्नो अभिभावक क्रिकेट बोर्डका साथ शानमा उपस्थित हुदा त्यो नेपाली खेलाडीसँग नहुदा खेलाडीमा खिन्नता पक्कै आउनेछ । यद्यपी पछिल्लो समयमा नेपाली खेलाडीले गरेको प्रदर्शन उच्चकोटीको र तारिफयोग्य छ ।

खेलाडी तथा प्रशिक्षकको आफ्नै बलबुताले नेपाली क्रिकेट लड्दै, फेरी उठ्दै विश्वकप छनोट सम्मको यात्रा पार गरेको छ । अबको यात्रा के हुन्छ ? 

कप्तान पारस भन्छन्, “डिभिजन टु मा जस्तै राम्रो प्रदर्शन गर्ने हो भने हामी अवस्य राम्रै गर्न सक्छौँ । सजिलो छैन । हरेक टिम राम्रो छ । आईसीसी विश्व क्रिकेट लिग च्याम्पियनसिपबाट छानिएका राष्ट्र र चार वटा टेष्ट प्लेयिङ राष्ट्र छन् ।”

 
सुपर सिक्समा नेपालको सम्भावना कति ?
नेपाल विश्वकप छनोटको सबै भन्दा कमजोर राष्ट्र गनिन्छ । त्यसैले अन्तर्राष्ट्रिय क्रिकेट परिषद् (आईसीसी) ले पनि अन्य राष्ट्रलाई जतिको महत्व नेपाललाई दिएको छैन । अन्य देशका मिडियाहरूले पनि त्यहि अनुसारको स्थान दिएका छन् । तर, वास्तविकता के हो भने नेपाल कुनै पनि टिमलाई पराजित गर्न सक्ने टिम हो ।

नेपाली क्रिकेट टिमका पूर्व कप्तान तथा यु–१९ क्रिकेट टिमका मुख्य प्रशिक्षक विनोद दासका अनुसार “नेपाल कुनै पनि बेला, जुनै टिमलाई हराउने क्षमता राख्छ । सबै खेलाडीले आफ्नो क्षमताअनुसार खेले जित सम्भव छ ।”

नेपाली क्रिकेट टिम सुपर सिक्समा प्रवेश गर्ने लक्ष्यसहित जिम्बावे प्रस्थान गरेको हो । सुपर सिक्सम पुग्ने नेपालको सम्भावना पनि छ । समूह बी मा रहेको आफ्नो ग्रुपको टप थ्री मा परे नेपाल सुपर सिक्समा पुग्नेछ । तर त्यो त्यति सजिलो भने छैन । 

कप्तान पारसले सुपर सिक्स र एक दिवसीय मान्यता पाउने लक्ष्य रहेको बताएका छन् । कप्तान पारसले भने “हाम्रो पहिलो लक्ष्य भनेको सुपर सिक्स पुग्ने हो । त्यसपछि हामी विश्वकपको सपना देख्न सक्छौँ । त्यति सजिलो हुने छैन । २ वटा राष्ट्र मात्रै विश्वकपमा छनोट हुने भएकाले कतिपय राष्ट्रले करिब २ वर्षदेखि नै अभ्यास थालेका छन् । अहिलेको लागि भनेको एक दिवसीय मान्यता पाउने र सुपर सिक्समा पुग्ने नै हो ।”

त्यसो त, नेपालले आफ्नो पहिलो खेल फागुन २० गते नै आयोजक जिम्बावेसँग प्रतिस्पर्धा गर्दैछ । जिम्बावे नेपालको लागि बलियो र नौलो टिम हो । उमेर समूहमा जिम्बावेसँग नेपालले प्रतिस्पर्धा गरेपनि सिनियर टिमसँग खेलेको छैन । 

‘पहिलो गाँसमै ढुंगा भने झै’ पहिलो खेलमा हारिन्छ भन्ने एक प्रकारको नेपाली खेलाडीमा मानसिक दबाब हुन सक्छ । तर, नेपाली क्रिकेट टिम जिम्बावे जानुअघि कप्तान पारसले आफूहरू निकै उत्साहित रहेको बताएका छन् ।  
 

“हामी निकै उत्साहित छौँ । किनभन्दा हामी सन् २००८ सालमा म आफै कप्तान हुदा यु–१९ मा जिम्बावेलाई हराएका थियौ । फेरी एउटा अवसर पाएका छौँ जिम्बावेका सिनियर टिमसँग खेल्ने । यदी हामी ग्राउण्डमा गएर राम्रो खेल्ने हो भने जिम्बावेलाई च्यालेन्ज गर्न सक्छौ ।” कप्तान पारसले भने ।

विगतको नमिठो हार
सन् २०१४ मा नेपालले विश्वकपमा प्रवेश गर्ने सुनौलो अवसर पाएको थियो । सन् २०१३ सालमा बर्मुडामा सम्पन्न आईसीसी विश्व क्रिकेट लिग डिभिजन थ्री को उपाधि नेपालले जितेसँगै विश्वकप छनोटमा प्रवेश गरेको थियो ।

नेपालसामु एक दिवसीय विश्वकप खेल्ने अवसर थियो । तर त्यो अवसर न्यूजील्याण्डमा सम्पन्न विश्वकप छनोटले साकार पार्न सकेन । त्यसपछि नेपाली क्रिकेट फेरि पछि धकेलिएको थियो । हुन त त्यसबेला नेपालको ‘दुर्भाग्य’समेत थियो । नेपालका कप्तान पारस खड्का घाइते थिए भने मुख्य अन्य खेलाडी पनि घाइते तथा विरामी परे । डिभिजन थ्री को उपाधि दिलाउन महत्वपूर्ण भूमिका खेलेका विकेटकिपर ब्याट्सम्यान सुवास खकुरेल विरामी परेका थिए ।

सन् २०१४ मा भएको विश्वकप छनोटमा नेपाली खेलाडी एमेच्योर भएको तर अहिले सबै खेलाडी फर्ममा रहेको कप्तान पारस बताउछन् । विगतको जस्तो नहुने उनको तर्क छ ।
कप्तान पारसले भने “लाष्ट टाइमको विश्वकप छनोटमा भने ३–४ जना खेलाडी घाइते थिए । त्यतिबेला खेलाडीहरू एमेच्योर थिए । पहिलो पटक डिभिजन वानको टिमसँग खेल्दा नेपाललाई निकै गाह्रो भएको थियो । त्यसपछि हामीले निकै राम्रो खेल्न पाएका छौ ।”

त्यसबेला विश्वकप छनोटबाट २ राष्ट्र स्कटल्याण्ड विजेता र युएई उपविजेता बन्दै विश्वकप खेलेको थियो भने नेपाल नवौ स्थानमा पर्दै पुनः डिभिजन थ्री मा घटुवा भएको थियो ।
त्यसबेला नेपालको समूह ‘ए’ मा स्कटल्याण्ड, युएई, हङकङ र क्यानडा थियो । अहिले पनि नेपालको समूहमा स्कटल्याण्ड र हङकङ छन् । त्यसबेला नेपालले आफ्नो समूहमा खेलेको कुनै पनि खेल जित्न सकेन । 

त्यसबेलाको विश्वकप छनोटमा नेपाल स्कटल्याण्डसँग ९० रन र हङकङसँग १० विकेटले पराजित भएको थियो । त्यस्तै, युएईसँग १०२ र क्यानडासँग १२ रनले पराजित भएको नमीठो हार नेपालसामु छ । प्ले अफको नवाँै स्थानको लागि भएको खेलमा भने नेपालले युगाण्डालाई १६० रनले पराजित गरेको थियो ।

नेपालले विश्वकप छनोटमा सहभागिता जनाएको यो तेस्रो पटक हुन्छ । यद्यपी सन् २००१ मा नेपालले भाग लिएको बेला आईसीसी ट्रफीको नाम थियो । त्यसबेला पनि नेपालले विश्वकप खेल्ने मौका खेर फालेका थिए । त्यसबेला नेपाल नामिवियासँग पराजित भएपछि विश्वकप खेल्ने अगाडीको ढोका बन्द भएको थियो ।