काठमाडौं । नेपाल प्रिमियर लिग (एनपीएल)को दोस्रो क्वालिफायरमा बिहीबार जनकपुर बोल्ट्स र कर्णाली याक्स मैदान उत्रिँदा दुवै टोलीको लक्ष्य जितसहित फाइनल पुग्ने हुनेछ ।

प्रतियोगितामा जनकपुर लिग चरणको दोस्रो स्थानमा रहँदै प्लेअफमा आएको हो । तर, पहिलो क्वालिफायरमा सुदूरपश्चिम रोयल्ससँग हार बेहोरेपछि जनकपुरले दोस्रो क्वालिफायर खेल्नुपर्ने भएको हो ।

आजको खेलमा जित निकाल्ने टिमले उपाधिका निम्ति आउँदो शनिबार सुदूरपश्चिम रोयल्सविरुद्ध प्रतिस्पर्धा गर्नेछ । यसअघि सुदूरपश्चिमले पहिलो प्लेअफमा जनकपुरलाई आठ विकेटले निराश बनाउँदै फाइनल यात्रा तय गरेको थियो ।

लिग चरणबाट चौथो स्थानमा रहँदै प्लेअफमा आएको कर्णालीले भने इलिमिनेटरमा चितवन राइनोजविरुद्ध २१ रनको जित निकाल्दै दोस्रो क्वालिफायरमा स्थान बनाएको हो ।

कीर्तिपुरस्थित त्रिवि क्रिकेट मैदानमा हुने यो खेल दिउँसो १२ः१५ बजेदेखि सुरु हुनेछ । यी दुई टिमबीच लिग चरणमा भएको खेलमा भने जनकपुरले कर्णालीविरुद्ध आठ विकेटको सहज जित निकालेको थियो ।

दोस्रो क्वालिफायरअघि बुधबार जनकपुरका कप्तान आसिफ सेखले राम्रो खेल्ने टिमले खेल जित्ने बताएका थिए ।

“भोलि जसले राम्रो खेल्छ उसैले जित्छ । फाइनलमा सुदूरपश्चिमसँग खेल्छौँ र उहाँहरूलाई हराएर उपाधि जित्छौँ भन्ने हाम्रो विश्वास छ,” दोस्रो क्वालिफायरअघि आसिफले भनेका थिए ।

यता, कर्णालीका कप्तान सोमपाल कामी पनि आफ्नो टिमले फाइनलसम्मको यात्रा तय गर्ने विश्वास व्यक्त गरे ।

फाइनलको भावना त म सुरुदेखि नै देखिरहेको थिए । यहाँसम्म खेल्न पाउँदा एकदमै खुसी छु । अब हामीसँग दुई खेल छ । दुई खेलमा म्याच विनर बन्ने । त्यसैको प्रतिक्षामा छौँ,” कर्णालीका कप्तान सोमपाल कामीले भने ।

लिग चरणको नतिजा
जनकपुरले प्रतियोगिताको सुरुआती चार खेलमा लगातार जित निकालेको थियो । तर, लिग चरणका अन्तिम तीन खेल खेल्दा भने जनकपुरले दुई खेलमा हार व्यहोरेको हो ।

जनकपुरले पहिलो खेलमा विराटनगर किंग्सविरुद्ध आठ विकेटको, दोस्रो खेलमा कर्णाली याक्सविरुद्ध पनि आठ विकेटको नै, तेस्रो खेलमा पोखरा एभेन्जर्सविरुद्ध सात विकेटको र चौथो खेलमा लुम्बिनी लायन्सविरुद्ध एक रनको जित निकालेको थियो । पाँचौँ खेलमा भने जनकपुरले सुदूरपश्चिम रोयल्सविरुद्ध ७२ रनको हार व्यहोरेको हो । छैटौँ खेलमा काठमाडौंविरुद्ध पाँच विकेटको जित निकालेको जनकपुरले सातौँ खेलमा चितवन राइनोजसँग ३२ रनको हार व्यहोरेको हो ।

यता, कर्णालीले भने पहिलो र दोस्रो खेलमा जनकपुर बोल्ट्स र काठमाडौं गुर्खाजविरुद्ध क्रमशः आठ र तीन विकेटले पराजित भएको थियो ।

कर्णालीले तेस्रो खेलमा चितवन राइनोजविरुद्ध ६ विकेट, चौथो खेलमा विराटनगर किंग्सविरुद्ध सात रन, पाँचौँ खेलमा पोखराविरुद्ध सात विकेट र छैटौँ खेलमा लुम्बिनी लायन्ससँग पाँच रनको जित निकालेको थियो । सातौँ खेलमा भने कर्णालीले सुदूरपश्चिम रोयल्सविरुद्ध ६ विकेटको हार व्यहोरेको थियो ।