एजेन्सी । ओलम्पिकको अन्तिम समारोहका लागि उत्तर कोरियाबाट फेरि उच्च प्रतिनिधिहरु तीन दिनको भ्रमणमा आउने भएका छन् भने अर्कोतर्फ अमेरिकाबाट राष्ट्रपति ट्रम्पकी छोरी इभान्का पनि उपस्थित हुने रोयटर्सले जनाएको छ ।
उत्तर कोरियाबाट आउने प्रमुख अधिकारीहरु मध्येका जर्नेल किम योङ छोललाई २०१० मा ४६ यात्रु बोकेको दक्षिण कोरियाली जहाज दुर्घटनाका दोषी बताइँदै आएको छ ।
किम योङ छोलकै नेतृत्वमा उत्तर कोरियाली अधिकारीहरु दक्षिण कोरिया आउने भएपछि अहिले यसबारे विभिन्न विवाद भइरहेको छ । २०१० मा भएको जहाज डुबानका लागि को जिम्मेवार छ भन्ने ठोस प्रमाण नभएपनि त्यस समय उनलाई नै दोषी ठहर्याइएको एकिकरण मन्त्रीले बताएका छन् ।
उत्तर कोरियाका इन्टेलिजेन्स चिफका रुपमा रहेका योङ छोलमाथि दक्षिणमा थुप्रै पटक हमलाको षड्यन्त्र रचेको आरोप रहेको छ ।
यति हुँदाहुँदै पनि उनलाई दक्षिण कोरियाले खेलको माहोलका लागि स्वागत गर्ने निर्णय गरेको बताएको छ । उनको आगमनले दक्षिण कोरिया र उत्तर कोरियाबीच मुख्य विवाद र लडाई सम्बन्धि मुद्दा समाधान हुने दक्षिणको विश्वास रहेको बताइएको छ ।
यसरी अमेरिका र उत्तर कोरियाका प्रतिनिधिहरु एकैसाथ एउटै कार्यक्रममा उपस्थित हुने भएपनि उनीहरुबीच कुनै भेटवार्ता नहुने अमेरिकी प्रशासनले बताएको छ ।
उता अमेरिकाबाट सहभागी हुने इभान्काको भने राष्ट्रपति मुनसँग खानपिन र वार्ताको कार्यक्रम रहेको जानकारी दिइएको छ । यसअघि भने उत्तर कोरिया र अमेरिकाबीच बैठक तय भएपनि अन्तिम समयमा उत्तर कोरियाले रद्द गराएको थियो । तर यसपटक दुवै देशबीच कुनै ओपचारिक भेट नहुने बताइएको छ ।