एजेन्सी । फ्रेन्च लिग फुटबल लिग वानमा लिग लिडर पेरिस सेन्ट जर्मेन (पिएसजी) पराजित भएको छ । आइतबार राति भएको खेलमा १० खेलाडीमा सिमित पिएसजी लियोनसँग २ – १ ले पराजित भएको हो ।
घरेलु मैदानमा लियोनलाई जित दिलाउन नबिल फिकिर र मेम्फिस डिपेले समान एक एक गोल गरे । पिएसजीका लेभिन कुर्जावाले एक गोल फर्काए । योसँगै पिएसजीले यो सिजन लिगमा दोस्रो हार बेहोरेको छ ।
पिएसजीविरुद्ध जित निकाल्न लियोनले पहिलो हाफको दोस्रो मिनेटमा फिकिरको गोलबाट सुरुवाती अग्रता बनाएको थियो । तर, नेयमारबिना मैदान उत्रेको पिएसजीले खेलको ४५ औं मिनेटमा बराबरी फर्कायो ।
पिएसजीका कुर्जुवाले गोल गर्दै खेल १ – १ को बराबरीमा ल्याएका थिए ।
दोस्रो हाफमा पिएसजी १० खेलाडीमा सिमित भयो । खेलको ५७ औं मिनेटमा ड्यानियल अल्भेसले रातो कार्ड खादै मैदानबाट बाहिरिदा पिएसजी १० खेलाडीमा सीमित भएको थियो । जसको फाईदा लियोनले लियो । त्यसपछि खेलको ९० औं मिनेटमा डिपेले गोल गर्दै लियोनलाई २ – १ को महत्वपूर्ण जित दिलाए ।
यो जितपछि लियोन फ्रेन्च लिगको दोस्रो स्थानमा उक्लिएको छ । लियोनले ४८ अंक जोडेको छ । पराजित पिएसजी ५६ अंकसहित शिर्ष स्थानमा यथावत रहेको छ । लिगको तेस्रो स्थानको मार्सेलीको ४७ अंक छ ।
