एजेन्सी । फ्रेन्च लिग फुटबल लिग वनमा साबिकको बिजेता पेरिस सेन्ट जर्मेन (पिएसजी) ले रेनसलाई पराजित गरेको छ । लिग अन्तर्गत शनिबार राति भएको खेलमा पिएसजीले रेनसलाई ४ – १ ले पराजित गरेको हो ।
दुवै टोलि १० – १० खेलाडीमा सीमित भएको खेलमा पिएसजीलाई जित दिलाउन नेयमारले दुई तथा केलियन एमबाप्पे र एडिन्सन काभानीले समान एक एक गोल गरे ।
रेनसका फिर्मिन मुबेलेले एक गोल फर्काए । खेलको दोस्रो हाफमा रेनसका बेन्जामिन आन्द्रे र पिएसजीका प्रेसनेल किमपेम्बेले दोहोरो पहेलो कार्डसहित रातो कार्ड खाएर मैदानबाट बाहिरिएपछि दुवै टोलि १० खेलाडीमा समेटिएको थियो ।
यो जितपछि पिएसजीले लिगमा आफ्नो अग्रता कायमै राखेको छ । पिएसजीले १८ खेलबाट ४७ अंक जोडेको छ । पराजित रेनस २५ अंक जोडेर छैटौं स्थानमा छ । दोस्रो स्थानमा रहेको मोनाकोको ३८ अंक छ । मोनाकोले शनिबार राति नै सेन्ट इट्टीनेलाई ४ – ० ले हराएको थियो ।