एजेन्सी । इंग्लिश प्रिमियर लिग फुटबलमा चेल्सीले सहज जित निकालेको छ । मंगलबार राति भएको खेलमा चेल्सीले हडर्सफिल्ड टाउनलाई ३ – १ ले पराजित गरेको हो ।

हडर्सफिल्डलाई उसैको घरेलु पराजित गर्न चेल्सीका लागि टाईमोउ बकायोको,विलियन र पेड्रो रोड्रीगेजले समान एक एक गोल गरे । घरेलु टोलीका लागि लौरेन्ट डेपोइट्रेले एक गोल फर्काए । गत शनिबार वेष्ट ह्यामसँग स्तब्ध चेल्सीले यो जितसँगै प्रिमियर लिगको उपाधि यात्रामा आफ्नो दाबेदार कायम राखेको छ । शनिबार भएको खेलमा चेल्सी वेष्ट ह्यामको हातबाट १ – ० ले पराजित भएको थियो ।

तुलनात्मक कमजोर टोलि हडर्सफिल्डविरुद्ध चेल्सीले सुरुवातबाटै आक्रामक खेल खेलेको थियो । जसको कारण पहिलो हाफमै चेल्सीले दुई गोल गर्न सक्यो । खेलको २३ औं मिनेटमा बकायोकोले गोल गर्दै चेल्सीलाई सुरुवाती अग्रता दिलाए । खेलको ४३ औं मिनेटमा विलियनले गोल गरेपछि पहिलो हाफमा चेल्सी २ – ० ले अघि रह्यो ।

दोस्रो हाफको सुरुवातमै चेल्सीले तेस्रो गोल गर्यो । खेलको ५० औं मिनेटमा पेड्रोले चेल्सीको अग्रता तेब्बर बनाए । त्यसपछि खेलको ९० औं मिनेटमा हडर्सफिल्डका लौरेन्टले एक फर्काएपनि चेल्सीले ३ – १ को सहज जित निकाल्यो ।

यो जितसँगै चेल्सीले दोस्रो स्थानको म्यानचेस्टर युनाइटेडसँग अंक बराबर गरेको छ ।  चेल्सीले १७ खेलबाट ३५ अंक जोडेको छ । तर, चेल्सी अझै शिर्ष स्थानको म्यानचेस्टर सिटी भन्दा ११ अंकले पछि छ । सिटीको ४६ अंक छ । लिगमा सिटी र युनाइटेडले एक खेल कम खेलेको छ । चेल्सीसँग पराजित हडर्सफिल्ड १८ अंक जोडेर १२ औं स्थानमा छ ।

प्रिमियर लिग अन्तर्गत नै मंगलबार राति भएको अर्को खेलमा क्रिष्टल प्यालेसले वाट्फोर्डलाई २ – १ ले पराजित गरेको छ । त्यस्तै बर्नलीले स्टोक सिटीलाई १ – ० ले हराएको छ ।