काठमाडौं । इनोभेटिभ र रिलायन्स रेसिडेन्सियलले २४ औं ज्ञान कार्निभल अन्तर्गत बास्केटबलको उपाधि शुक्रबार जितेका छन् ।
ज्ञान कार्निभल अन्तर्गतको बास्केटबलमा इनोभेटिभ ब्वाइज तथा रिलायन्स गर्ल्समा च्याम्पियन बनेको हो । यस्तै ब्वाइज फुटबलमा मल्पीले पहिलो स्थान हात पारेको छ ।
खोकनास्थित आयोजक ज्ञानोदयको कोर्टमा भएको ब्वाइज बास्केटबल फाइनलमा इनोभेटिभले ज्ञान निकेतनलाई ७७–६८ ले पराजित गर्यो ।
इनोभेटिभको जितमा आयुश लामाले उत्कृष्ट प्रदर्शन गर्दै सर्वा्धिक ४० अंक योगदान गरे ।
पहिलो क्वाटरमा २०–१० को अग्रता लिएको इनोभेटिभ दोश्रोमा १९–२५ ले पछि पर्यो । इनोभेटिभले तेश्रो क्वाटरमा २०–१४ को अग्रता बनायो भने चौथोमा १८–१९ ले पछि रह्यो ।
गल्र्सको उपाधि भिडन्तमा रिलायन्सले इनोभेटिभलाई ३२–३० को झीनो अन्तरले हरायो । रिलायन्सकी रिना भण्डारीले ११ अंक जोडिन् ।
तेश्रो क्वाटरको समाप्तिसम्म इनोभेटिभ २१–१५ ले अगाडि थियो ।
त्यो अवस्थालाई उल्टाएर उपाधि सुनिश्चित गर्न रिलायन्सले चौथो तथा अन्तिम क्वाटर १७–९ ले आफ्नो पक्षमा पा¥यो । बास्केटबलको ब्वाइजमा इनोभेटिभका आयुश लामा तथा गल्र्समा रिलायन्सकी कविता श्रेष्ठ ‘मोस्ट भेलुएबल प्लेयर’ घोषित भए ।
ब्वाइज फुटबलको फाइनलमा मल्पीले आयोजक समेत रहेको डिफेन्डिङ च्याम्पियन ज्ञानोदयलाई १–० ले पाखा लगायो । मल्पीका रिन्जिन लामाले निर्णायक गोल गरे । फुटबलमा ज्ञानोदयका पाल्साङ वाङदी लामा उत्कृष्ट चुनिए ।
विजेतालाई ज्ञानोदय विद्यालय व्यवस्थापन समितिका अध्यक्ष बुद्धवीर लामा, संस्थापक प्रिन्सिपल इन्दिरा याक्थुम्बा, सिनियर प्रिन्सिपल भानु ए र इनोभेटिभका निर्देशक अनन्त कुँवरले एक कार्यक्रमबीच पुरस्कृत गरे ।
साताव्यापी प्रतियोगिताको बास्केटबलतर्फ ब्वाइजमा १२ र गल्र्समा ८ तथा फुटबलमा १२ टिम सहभागी थिए ।
