एजेन्सी । घरेलु मैदानमा नाइजेरियाविरुद्धको अन्तर्राष्ट्रिय मैत्रीपूर्ण खेलको दौरान अर्जेन्टिना स्ट्राइकर सर्जियो अग्युरो बेहोस भएका छन् । पहिलो हाफको खेल सकिएपछि ड्रेसीङ रुम पुगेका अग्युरो बेहोस भएको बीबीसीले जनाएको छ ।
२९ बर्षीय अग्युरो ड्रेसीङ रुममा बेहोस भएर लडेपछि उनलाई तत्काल अस्पताल लागिएको थियो । अहिले उनको अवस्था सामान्य भइसकेको अन्तर्राष्ट्रिय समाचार संस्थाहरुले जनाएको छ । उनी अस्पतालबाट होटल फर्किएर टिमका खेलाडीहरुसंग आराम गरिरहेको अर्जे्न्टिना फुटबल एसोसियसनले जनाएको छ ।
बेहोस भएर लड्नुअघि अग्युरोले नाइजेरियाविरुद्ध एक गोल समेत गरेका थिए । तर, उक्त खेलमा अर्जेन्टिना ४ – २ ले पराजित भएको थियो । नाइजेरियाको जितमा एलेक्स इओबीले दुई तथा केलेची इहानाचो र ब्रेइन इदोउले समान एक एक गोल गरे । अर्जेन्टिनाका अग्युरो र इभर बेनेगाले समान एक एक गोल फर्काए ।
आगामी बर्ष रुसमा हुने विश्वकप फुटबलको तयारीका लागि दुई टोलीले मैत्रीपूर्ण खेल खेलेको हो । दुवै टोली विश्वकपमा छनोट भएका छन् ।
