गोरखामा कम्युनिस्ट गठबन्धनका उमेदवार चडेको मोटरसाइकल खानतलास गर्दा हतियार भेटिएको घटनाले चुनावमा हिंसा हुने पो हो कि भन्ने त्रास बढेको छ । गोरखाको धावामा प्रहरीले सुरक्षा जाँच गर्दा नेपाल कम्युनिस्ट पार्टी (माओवादी)की समानुपातिकतर्फ प्रतिनिधि सभाकी उमेदवार चडेको मोटर साइकलमा मंगलबार दिउँसो चालकको झोलाबाट अवैध पिस्तोल र गोली फेला परेको हो । यसपटक कम्युनिस्ट गठबन्धन र नेपाली कांग्रेसका तर्फबाट समेत चुनावको मैदानमा कुख्यात गुन्डा नाइकेहरूलाई उमेदवार बनाइएको छ । यसले निर्वाचनमा बाहुबलीहरू अब कर्ताकै रूपमा अगाडि सरेको सन्देश दिएको छ । मूलतः गालीगलौजले भरिएका घोषणापत्र र तिनमा पनि नेताहरूको आक्रामक अभिव्यक्तिले कार्यकर्ता उत्तेजित हुने वातावरण निर्माण भइरहेको थियो । त्यसमाथि उमेदवारहरूसँग बन्दुक फेला पर्न थालेपछि हिंसाको जोखिम बढेको हो । अहिलेसम्म चुनाव प्रचारका क्रममा खासै अप्रिय घटना भएका थिएनन् ।   

एकातिर गुन्डा नाइकेहरू निर्वाचनको मैदानमै उत्रिने र अर्कातिर उमेदवारसँग बन्दुक भेटिनेजस्ता घटनालाई सामान्य संयोगमात्र मान्न मिल्दैन । गोरखामा माओवादी उमेदवारले आपूmले हतियार नलिएको र मोटरसाइकल चालकसँग लिफ्टमात्र लिएको वयान प्रहरीलाई दिएकी छन् । हतियार लिएर हिँडेका चालक फरार छन् । यसैले हतियार कस्को हो र उमेदवार तथा मोटरसाइकल चालकको सम्बन्ध के हो भन्ने विषय अझै स्पष्ट भइसकेको छैन । गोरखाबाट प्रतिनिधि सभा सदस्यको उमेदवार पूर्व प्रधानमन्त्री डा. बाबुराम भट्टराईले सामाजिक सञ्जाल ट्विटरमार्फत् चिन्ता प्रकट गरेका छन् । उनको चिन्ताले पनि स्थिति गम्भीर रहेको पुष्टि हुन्छ अरूलाई भन्दा माओवादी र त्यसमा पनि गोरखाका माओवादीको मनोविज्ञान भट्टराईलाई पक्कै बढी थाहा हुनुपर्छ । । कारण, भट्टराई स्वयं पूर्व माओवादी नेता भएका कारण माओवादी कार्यशैली र मानसिकताका आधिकारिक जानकार हुन् ।

कम्युनिस्ट गठबन्धनका नेताहरूले सरकारमाथि चुनाव टार्न खोजेको आरोप लगाउँदै आएका छन् । अर्कातिर, उनीहरूकै उमेदवार चडेको सवारीमा हतियार भेटिन थालेको छ । यसैले सरकारले आफ्नो कर्तव्य पूरा गर्न पनि सुरक्षा प्रबन्ध सुदृढ बनाउन बढी ध्यान दिनुपर्ने देखिन्छ । प्रहरीले मोटरसाइकल चालकलाई खोजेर यथार्थ पत्ता लगाई कानुनअनुसार कारबाही गर्नुपर्छ । चुनावको बेलाको घटनाभन्दै सामसुम पार्न खोजियो भने त्यसको परिणाम प्रत्युत्पादक हुनसक्छ । साथै, एक जना उमेदवारको सवारी चालकसँग एउटा बन्दुक भेटिँदैमा त्यसलाई सामान्यीकरण गरेर आतंकित हुन भने पर्दैन । तर, यस्ता घटनालाई सरकार र राजनीतिक दलहरूले गम्भीरतापूर्वक भने लिनैपर्छ । विध्वंशको डँडेलो सल्कन आक्रोशको सानो झिल्का नै पर्याप्त हुन्छ । यसैले सरकारले गोरखामा बन्दुक भेटिएको घटनालाई प्रतिनिधि उदाहरणका रूपमा गम्भीरतापूर्वक लिनु उचित हुनेछ ।