जाजरकोट । यहाँका गाउँ गाउँमा चुनावी गतिविधि तीव्र भएका छन् । प्रदेशसभा र प्रतिनिधिसभाको उम्मेदवारको नाम टुङ्गो लागेपछि केही दलहरु चुनावी प्रचारमा लागेका हुन् । 

जाजरकोटमा सबैभन्दा अगाडि उम्मेदवार टुङ्गो लगाएको नेकपा माओवादी केन्द्रले सबैभन्दा पहिले प्रचारको कुरा लिएर गाउँ गाउँमा गएको छ । माओवादी केन्द्रको पछिपछि प्रदेशसभाको उम्मेदवार छनोटमा पछि परेको नेपाली कांग्रेसले प्रतिनिधिसभाको उम्मेदवार र प्रदेशसभाको क्षेत्र नं २ को उम्मेदवार छनोट गरेको छ । 

तर क्षेत्र नं १ को उम्मेदवार छनोटमा कुरा नमिलेपछि समस्या परेको छ । छनोट भइसकेको क्षेत्रका उम्मेदवार चुनावी प्रचारप्रसारमा लागिसकेका देखिन्छन् । कांग्रेस पनि प्रदेशसभाको क्षेत्र नं २ र प्रतिनिधिसभाको प्रचारमा जुट्दै गाउँ गाउँमा लागेको छ । 

नेकपा एमालेले कुनै पनि उम्मेदवार छनोट गर्न सकेको छैन । एमालेले आन्तरिक छलफलमा रहेको जनाएको छ । आकांक्षी धेरै भएपछि उम्मेदवार छनोटमा समस्या भएको एमालेले बताएको छ । 

प्रचारप्रसारमा सबैभन्दा अगाडि उम्मेदवार छनोट गरेको माओवादी केन्द्र प्रचारप्रसारमा पनि निकै अगाडि देखिएको छ । रासस