देश

४ हजार बढी घर डुबानमा, हजारौं बिस्थापित 

काठमाडौं । लगातारको वर्षाले ४ हजार बढी घर डुबानमा परेका छन् । झापा, मोरङ, सुनसरी, महोत्तरी, कैलाली लगायतका जिल्लामा गरी ४ हजार बढी घर डुबानमा परेको हो ।
झापाको बेतिनी खोलामा आएको बाढीले नदी छेंउमा रहेका करिब २० वटा कच्चि घर बगाएको छ । यसैगरी झापा गाउँपालिका ५, ६ र ७ सनामती गाउँमा बिरिङ खोलामा आएको बाढीले बस्ती डुबानमा पर्दा करीब १२ सय घर डुबानमा परेका छन् ।
मोरङको जहदा गाँउपालिका–३ र ४ स्थित लोहान्द्र खोलामा आएको बाढी गाउँमा पस्दा करीब १ सय ५० घर डुबानमा परेका छन् । सोही गाउँपालिका–७ महादेव कोल र भिमपुरमा सोही खोलाको बाढी पसी ४ सय घर डुबानमा परेका छन् । यसैगरी रंगेली नगरपालिका–५ बजारमा बक्राह खोलाको बाढी पसेर करीब २० घर डुबानमा परेका छन् । 
महोत्तरीको लोहारपट्टी गाउँपालिका–४ स्थित स्टेशन टोलमा १० वटा घर डुबानमा परेका छन् ।
कैलालीको भजनी नगरपालिका–८ स्थित खैरा, कृष्णनगर, काडाढिक, सोनाफाटा, खल्ला, भ्रतनापुर, दैलेखि टोल, जनकपुर, बाहादुरपुर छछरुवामा अवरिल बर्षासंगै आएको बाढीले करीव १ हजार १ सय ५० घरधुरी पूर्ण रुपमा डुवानमा परेका छन् । त्यसैगरी भजनी नगरपालिका–२ स्थित घरुवा, कटकानपुर, पल्टुपुर, मोहनपुर गरी ३ सय ४७ घर धुरी समेत पूर्ण रुपमा डुवानमा परेका छन् ।
सोही नगरपालिका–६ नवलपुर, थापापुर, बिस्नापुर, बसाहा, खोदाउपुरमका करीव १ हजार घरधुरी आंशिक रुपमा डुवानमा परेका छन् । 
 

तपाईंको मत