काठमाडौं । नेकपा एमालेले बेवास्ता गरेपछि रामचन्द्र झा नयाँ शक्ति छाडेर माओवादी केन्द्रमा क्रियाशील हुने भएका छन् । 

नेकपा माओवादी केन्द्रका अध्यक्ष पुष्पकमल दाहाल प्रचण्ड निवासमा भएको छलफलपछि  झा र  रामकुमार शर्माले आफूहरु सम्पूर्ण रुपले माओवादी केन्द्रमै क्रियाशील रहने प्रतिवद्धता व्यक्त गरेका हुन् । छलफलमा नेता मातृका यादव, रामचन्द्र झा, रामकुमार शर्मा र श्रवण यादवले मधेशमा माओवादीलाई शक्तिशाली बनाउन आफूहरु एकतावद्ध भएर अघि बढ्ने समेत संकल्प गरेका छन् ।

छलफलमा अध्यक्ष प्रचण्ड, पार्टी हेर्डक्वाटर सदस्य एवं गृहमन्त्री जनार्दन शर्मा ‘प्रभाकर’ र नेतृ उर्मिला अर्याल पनि सहभागी थिए ।  छलफलपछि नेता झा र शर्माले मधेशमा माओवादी केन्द्रलाई शक्तिशाली बनाउन आफूहरु सम्पूर्ण रुपले समर्पित रहने संकल्प गरेको प्रचण्डको सचिवालयले जनाएको छ ।

झा यसअघि नयाँ शक्ति छाडेर नेकपा एमालेमा प्रवेश गर्ने तयारीस्वरुप छलफल थालेका थिए । तर नेकपा एमालेले बेवास्ता गरेको नेताहरुले बताएका छ्न । नेता झाले भने नेकपा एमाले मधेसको मुद्दामा स्पष्ट नभएसम्म सहकार्य गर्न नसकिने बताएका छन् ।