काठमाडौं । नेकपा एमालेका अध्यक्ष केपी शर्मा ओलीले लोकतन्त्रमा विश्वास गर्ने पार्टीहरु निर्वाचनमा सहभागी हुने बताएका छन् । उपचारपछि थाइल्याण्डबाट फर्किएका एमाले अध्यक्ष ओलीले बिहीबार त्रिभुवन विमानस्थलमा पत्रकारहरुसँग कुरा गर्दै यस्तो बताएका हुन् ।
“निर्वाचनको वातावरण बनेको छ,” ओलीले भने, “निर्वाचन अब एकै चरणमा हुनुपर्छ । दुई चरणमा हुँदैन । कांग्रेस पनि देशभर नाचेर सक्यो । कांग्रेसको नाच पनि राम्रै लाग्यो ।”
नेपाली कांग्रेसका शीर्ष नेताहरु आफ्नो निर्वाचन क्षेत्रमा पुगेर नाचगान गरेको केही दिनपछि ओलीले यस्तो प्रतिक्रिया दिएका हुन् ।
कांग्रेसले झापामा गरेको कार्यक्रममा कांग्रेस सभापति शेरबहादुर देउवासहित शीर्ष नेताहरु केहीबेर नाचेका थिए । उनले नेकपा एमालेको घोषणापत्र पनि केही दिनभित्रै सार्वजनिक गर्ने बताए ।