काठमाडौं सन् २०२६ को विश्वकप फुटबलमा अहिलेसम्मकै बढी ४८ राष्ट्र सहभागी हुने भएका छन् । विश्व फुटबल महासंघ (फिफा) ले मंगलबार विश्वकपमा ४८ राष्ट्र रहने प्रस्ताव पारित गरेसँगै विश्वकपमा ४८ टिमको सहभागिता रहने भएको हो ।
फिफा अध्यक्ष गियानी इन्फान्टिनोले गत कार्तिकमा विश्वकप फुटबलको अन्तिम चरणमा प्रतिस्पर्धा गर्ने सहभागी हुने टिमको संख्या बढाउने प्रस्ताव गरेका थिए । इन्फान्टिनोले गएको फेब्रुअरीमा फिफा अध्यक्ष बन्दा विश्वकपमा सहभागी हुने टिमको संख्या ४० पुर्याउने बताएका थिए । फिफाको मुख्यालय जुरिचमा मंगलबार बसेको फिफाको काउन्सिल बैठकले अध्यक्षको प्रस्ताव अनुमोदन गरेसंगै विश्वकपमा ४८ राष्ट्रले प्रतिस्प्रधा गर्ने भएको हो ।
यसअघिका विश्वकपमा ३२ टोलीको सहभागिता रहँदै आएको थियो । आगामी सन् २०२६ मा हुने विश्वकपको आयोजक राष्ट्र भने तय भएको छैन । त्यसअघि सन् २०१८ मा रसिया र २०२२ मा कतारमा हुने विश्वकप भने अहिलेकै ढाँचाअनुसार हुनेछ । उक्त विश्वकपमा ३२ टिम नै सहभागी गराउने फिफाको योजना छ ।
फिफाको काउन्सिल बैठकले ४८ टोली रहने निर्णय पारित पछि विश्वकपको समूह चरणमा १६ समूह रहने छन् । प्रत्येक समूहमा ३ राष्ट्र रहने छन् । अब विश्वकपमा ८० वटा खेल हुनेछन् । प्रत्येक समुहका शिर्ष दुइ टोलि नक आउट चरण (अन्तिम ३२) मा पुग्ने छन् । समूह चरणबाट १६ टिम बाहिरिने छन् । त्यसपछिको प्रतिस्पर्धा अहिलेकै संरचनमा हुनेछ ।
हालसम्म विश्वकपको सहभागी टोलीको वृद्धि:
मिति सहभागी राष्ट्र आयोजक राष्ट्र खेल संख्या
सन् १९३० १३ उरुग्वे १८
सन् १९३४ १६ इटाली १७
सन् १९५० १५ ब्राजिल २२
सन् १९५४ १६ स्विजरल्याण्ड २६
सन् १९७४ १६ जर्मनी ३८
सन् १९८२ २४ स्पेन ५२
सन् १९८६ २४ मेक्सिको ५२
सन् १९९८ ३२ फ्रान्स ६४
सन् २०२६ ४८ तोकिएको छैन ८०
