देश
सुरेश बुढाथोकी
सिन्धुपाल्चोक । गत वर्ष वैशाखमा गएको भूकम्पबाट सबैभन्दा धेरै प्रभावित सिन्धुपाल्चोकका भूकम्पपीडितलाई निजी आवास निर्माणका लागि ९० प्रतिशत छुटमा सालको काठ वितरण गर्न सुरु गरिएको छ । आइतबार चौतारा नगरपालिकाका सर्बे तामाङ र किरणमान श्रेष्ठलाई काठ प्राप्त गर्ने काठ छुट पुर्जी दिँदै वन तथा भू–संरक्षण मन्त्री अग्निप्रसाद सापकोटाले काठ वितरणको सुरुवात गरे ।
सिन्धुपाल्चोकसँगै भूकम्पबाट प्रभावित १४ जिल्लाका भूकम्पपीडितलाई क्षतिग्रस्त घर पुनर्निर्माणका लागि ९० प्रतिशत छुटमा काठ उपलब्ध गराउने मन्त्रिपरिषद्को निर्णयअनुसार सिन्धुपाल्चोकका भूकम्पपीडितलाई आइतबारबाट सालको काठ वितरण गर्न सुरु गरिएको हो ।
यसरी वितरण गरिएको काठलाई भूकम्पपीडितले प्रति क्युफिट ९२५ रुपैयाँ तिर्नुपर्नेछ । वन मन्त्रालयको निर्देशिकाको दफा ११ को ११ नम्बर बुँदाअन्तर्गत पीडितलाई काठको बजार मूल्यको ९० प्रतिशत छुटमा ढुवानी खर्च जोडेर प्रति क्युफिट ९२५ रुपैयाँमा वितरण गरिएको हो । हाल सालको काठको बजार मूल्य प्रति क्युफिट ४ हजार ५ सयदेखि ५ हजार रुपैयाँसम्म छ । सिन्धुपाल्चोकमा प्रतिघर २५ क्युफिटका दरले काठ वितरण गर्न सुरु गरिएको छ ।
सिन्धुपाल्चोकका ७८ हजार ५३४ जना भूकम्पपीडितमध्ये सहुलियत दरमा काठ प्राप्तिका लागि २५ हजारले जिल्ला वन कार्यालयमा निवेदन दिएका छन् । सबै पीडितलाई २५ क्युफिटका दरले काठ वितरण गर्ने हो भने ६० हजार क्युफिट काठ आवश्यक पर्छ । तर, पहिलो चरणको वितरणका लागि २ हजार क्युफिटमात्र चौतारा काठ वितरण डिपोमा ल्याइएको छ ।
वन विभागको निर्देशिकामा भूकम्प प्रभावित जिल्लामा प्रभावित नभएका जिल्लाबाट जम्मा काठको ५० प्रतिशतसम्म पैठारी गर्न पाइने प्रावधान छ । सोही प्रावधानअनुरूप नवलपरासी जिल्लाबाट २ हजार क्युफिट काठ सिन्धुपाल्चोक ल्याइएको छ । ९० प्रतिशत छुटमा काठ वितरण गर्ने अवधि ५ वर्षसम्म रहने वन मन्त्रालायले जनाएको छ । “हामीले पहिलो चरणमा २ हजार क्युफिट सालको काठ सिन्धुपाल्चोक ल्याएका छौं,” वनमन्त्री सापकोटाले भने, “५ वर्षसम्म सहुलियतको काठ पाइनेछ ।”
सहुलियत दरमा काठ प्राप्तिका लागि निवेदन दिएका पीडितलाई उनीहरूको आवश्यकता र घर निर्माण सुरु गरिसकेको आधारमा प्राथमिकतामा राखी काठ वितरण गर्दै जाने जिल्ला वन अधिकृत तथा वन पैदावार आपूर्ति समितिका संयोजक शिवबहादुर सापकोटाले बाह्रखरीलाई बताए ।
प्रकाशित मिति: सोमबार, असार २७, २०७३ १३:०२
प्रतिक्रिया दिनुहोस्