काठमाडौं । इंग्ल्यान्ड तथा विश्वकै सबैभन्दा पुरानो क्रिकेट क्लब मेरिलोबोन क्रिकेट क्लब (एमसीसी) सँगको मैत्रीपूर्ण खेलको लागि नेपाली राष्ट्रिय क्रिकेट टोली त्यसतर्फ प्रस्थान गरेको छ । 

एमसीसीसँगको खेलका लागि पारस खड्काको कप्तानीमा १५ सदस्यीय नेपाली टोली सोमबार इंग्ल्यान्ड भ्रमणमा निस्किएको हो ।

 

नेपाली टोलीले आगामी साउन ४ गते मेरिलोबोन क्रिकेट क्लब एमसीसीसँग लर्डसमा खेल्नेछ । खेल ५० ओभरको हुनेछ । नेपाल र ब्रिटेनबीचको कुटनीतिक सम्बन्ध स्थापना भएको २ सय वर्ष पुगेको अवसरमा नेपालको लर्ड्समा खेल्न लागेको हो ।  त्यस्तै नेपाली टोलीले त्यसअघि स्थानीय क्लबसँग अन्य ४ मैत्रीपूर्ण खेल खेल्ने छन् । त्यसमा दुई ५० ओभर, एक ४० ओभर र एक ट्वान्टी–२० रहेको छ ।  

 

बेलायत भ्रमणलाई नेपाली टोलीको विश्व क्रिकेट लिग च्याम्पियनसिप अन्तरगत नेदरल्याण्डसँगको खेलको तयारीका रुपमा समेत हेरिएको छ । नेपालले नेदरल्याण्डसँग आगामी साउन २९ र ३१ गते उसैको मैदानमा खेल्नेछ । विश्व क्रिकेट लिग च्याम्पियनसिपमा तेस्रो चरणको खेल सकिँदा नेपाल नेपाल छैटौं स्थानमा छ ।

 

अन्तराष्ट्रिय क्रिकेट परिषद् (आईसीसी) ले नेपाल क्रिकेट संघ क्यानलाई निलम्बित गरेपछि नेपाली टोली पहिलो अन्तराष्ट्रिय खेल खेल्न इंग्ल्यान्ड गएका हुन् । क्यानमा राजनीतिक हस्तक्षेप भएको र क्यान विवादमा फसेको भन्दै आईसीसीले गएको अप्रिलमा क्यानमाथि प्रतिबन्ध लगाएको थियो ।  

 

इंग्ल्यान्ड जाने नेपाली टोलीका कप्तान पारस खड्का, उपकप्तान ज्ञानेन्द्र मल्ल शक्ति गौचन, बसन्त रेग्मी, शरद भेषावकर, सोमपाल कामी, सागर पुन, विनोद भण्डारी छन् । यस्तै करण केसी, सन्दिप लामिछाने, राजु रिजाल र राजेश पुलामी मगर, सुवास खकुरेल, विक्रम शोव र अनिल मण्डल रहेका छन् । नेपाली टोलीको मुख्य प्रशिक्षक जगत टमाटा रहेका छन् ।