सुरेश बुढाथोकी

सिन्धुपाल्चोक ।

जिल्ला नापी कार्यालय सिन्धुपाल्चोकबाट प्रवाह हुने सबै प्रकारका सेवालाई ‘डिजटलाइज’ गरिएको छ । कार्यालयबाट प्रदान गरिने नक्सा ट्रेस, कित्ताकाट, ब्लु प्रिन्ट फिल्ड बुक लगायतका सेवालाई ‘डिजिटलाइज’ गरिएको हो । नापी कार्यालयबाट दिईने डिजिटल सेवाको शुभारम्भ आइतबार नापी बिभागका महानिर्देश कृष्णराज विशीले गरेका हुन् । आफ्नो कार्यालयबाट प्रदान गरिने सबै सेवालाई डिजिटलाइज गर्ने नापी कार्यालय सिन्धुपाल्चोक पहिलो सरकारी कार्यालय हो ।

नापी कार्यालयबाट प्रवाह हुने सेवा ‘डिजिटलाइज’ गरेसँगै नापीमा काम लिएर आउने सेवाग्राहीरुले छिटो छरितो तरिकाले सेवा पाउने भएका छन् । नापी कार्यालयबाट प्रदान गर्ने नक्साको ट्रेस सेवाग्राहीले अब १ मिनेटमै पाउने भएका छन् । यसअघि नक्सा टे«स बनाउन ४५ मिनेटदेखी १ घण्टासम्म लाग्थ्यो भने अब १ मिनेटमै नक्साको टे«स बनाउन सकिने नापी कार्यालयले बताएको छ ।

जसबाट जिल्लाको हिमाली भेगदेखी नापी कार्यालयमा काम लिएर आउने सेवाग्राहीको श्रम तथा समयको बचत हुनेछ ।

नापी कार्यालयको यो सेवालाई ‘डिजिटलाइज’ गर्नुभन्दा पहिले नक्साको टे«स बनाउन घाम लाग्नुपथ्र्यो । घाम नभएको समयका नक्सा निकाल्ने काम ठप्पप्रायः हुन्थ्यो । तर अब भने सेवाग्राहीले घाम पनि कुर्न नपर्ने भएको छ । “यसअघि एउटा नक्सा टे«स निकाल्न १ घण्टासम्म समय लाग्थ्यो । साथै घाम नलागेको बेला टे«स निकाल्ने कामै हुदैनथ्यो ।

एकजना कर्मचारीले दैनिक मुस्किलले १० वटा मात्र टे«स निकाल्न सक्थे तर अब भने दैनिक ४० वटा नक्सा टे«स सजिलै निकाल्न सकिन्छ”, नापी कार्यालय सिन्धुपाल्चोकका कार्यालय प्रमुख शरदचन्द्र मैनालीले भने । नक्साको साथै ब्लु प्रिन्ट, कित्ताकाट, फिल्डबुक लगायतका सेवा पनि छिटो छरितो तरिकाले प्रदान गर्न सकिने मैनालीले बताए ।