काठमाडौं । देशकै ठूलो मल्टिप्लेक्स क्यूएफएक्स चेनले चलचित्र ‘बोक्सीको घर’लाई शो थपेको छ । शुक्रबार अधिकांश हलमा हाउसफुल भएपछि क्यूएफएक्सले आज (शनिबार)का शो थपेको हो । 

आज ‘बोक्सीको घर’ले क्यूएफएक्समा ८५ शो पाएको छ । काठमाडौंमा ४० र मोफसलमा ४५ शो पाएको हो । 

अग्रिक बुकिङ खोल्दा क्यूएफएक्सले काठमाडौंमा २४ र मोफासलमा ३२ गरि जम्मा ५६ शो उपलब्ध गराएको थियो । शुक्रबार यो सिनेमाले ललितपुरको लाबिम, काठमाडौंको सिभिल, भक्तपुरको भाटभटेनीस्थित क्यूएफएक्सले उपलब्ध गराएका अधिकांश शो हाउसफुल भएका थिए । अन्य हलमा पनि धेरै शो हाउसफुल भए । हाउसफूल नभएका हलमा पनि उच्च अकुपेन्सीमा सिनेमा चलेको थियो ।

ललितपुरको लाबिममा ९ वटा शो पाएको सिनेमाले सिभिल महलमा ८ शो पाएको छ । 

शुक्रबार राम्रो ब्यापार गरेपछि क्यूएफएक्सले शनिबार शो बढाएको हो । 

नेपालको दोस्रो ठूलो मल्टिप्लेक्स आईएनआई सिनेमाजले आफ्ना तीनवटा आउटलेटमा १८ शोबाट बढाएर २६ शो पुर्याएको छ । 

अन्य हलले पनि शो बढाएका छन् ।  शो बढेको र बुकिङ पनि राम्रो देखिएकाले ‘बोक्सीको घर’ले आज आक्रामक कलेक्सन गर्ने देखिएको छ । 

सुलक्षण भारतीको लेखन तथा निर्देशन रहेको चलचित्रमा केकी अधिकारी मुख्य भूमिकामा छिन् । 

थ्रिलर जनरामा निर्माण भएको चालचित्रले समाजमा प्रचलित ‘बोक्सी’ कुप्रथालाई चित्रण गरेको छ । महिलालाई बोक्सीको आरोप लगाएर समाजले उनीहरूमाथि गर्ने शोषणको वरिपरि रहेर सिनेमाले कथा भन्छ । 

केकी अधिकारी फिल्मस्को प्रस्तुति निर्माण भएको सिनेमामा निर्माताका रूपमा केकीका बुवा बद्री अधिकारी रहेका छन् । राज घिमिरे कार्यकारी निर्माता हुन् ।

सिनेमामा केकीसँगै सुपला सापकोटा, श्वेच्छा राउत, सुलक्षण भारती, रमा थपलिया, सुष्मा निरौला, सबिन बास्तोलालगायतको अभिनय छ ।

लोचन रिजालको ब्याकग्राउन्ड म्युजिक रहेको सिनेमामा शिवराम श्रेष्ठको छायांकन र लोकेश बज्राचार्यको सम्पादन छ । टिफल्क फिल्मसले चलचित्र वितरण गरेको छ ।