राजनीति
काठमाडौं । पुराना इलाकालाई नै आधार मानेर स्थानीय निकायको पुनर्संरचना गर्न सरकार र राजनीतिक दलहरू सहमत भएका छन् ।
सोमबार सरकार, राजनीतिक दल र आयोगबीच भएको छलफलमा पुराना ९२७ इलाकालाई नै आधार मानेर राज्यको पुनरसंरचना गर्ने सहमति जुटेको हो । सरकारका तर्फबाट प्रधानमन्त्री पुष्पकमल दाहाल, स्थानीय विकासमन्त्री हितराज पाण्डे, नेपाली कांग्रेसका तर्फबाट सभापति शेरबहादुर देउवा र नेकपा एमालेबाट भीम रावल सहभागी बैठकले यसअघि मन्त्रिपरिषद् बैठकले गरेको निर्णयलाई नै सदर गर्दै पुराना इलाकालाई नै आधार मान्ने निर्णय गरेको हो ।
बैठकपछि पत्रकारहरुसँग कांग्रेस सभापति शेरबहादुर देउवाले भने, “पुराना इलाकालाई नै आधार मानेर स्थानीय निकायको पुनर्संरचना गर्ने सहमति भयो । तर, अहिलेकै ९२७ नै हुनुपर्छ भन्ने छैन ।”
स्थानीय विकासमन्त्री हितराज पाण्डेले आयोगलाई कात्तिक मसान्तभित्र पुरानै इलाकालाई आधार मानेर स्थानीय निकायको पुनर्संरचना गर्न दिने निर्णय भएको बताए । “तर, पुरानै इलाका र सीमा नै हुन्छ भन्ने छैन । त्यसमा तल–माथि हुनसक्छ । यसमा आयोगले विवेक पुर्याएर काम गर्छ,” उनले भने ।
एमाले नेता भिम रावलले मन्त्रिपरिषद्ले गरेको पुरानै निर्णयमा आजको बैठकले पनि सहमति गरेको जानकारी दिए ।
स्थानीय निकाय पुनर्संरचना आयोगका अध्यक्ष बालानन्द पौडेलले अब स्थानीय निकायको पुनर्संरचना गर्ने भन्ने विषयमा अन्योल समाप्त भएको बताए । उनले भने, “कात्तिक मसान्तभित्रको समय सीमाभित्र काम गर्न सकिन्छ या सकिँदैन, यसबारे आयोगका कर्मचारीसँग बसेर छलफल गर्छौं ।”
प्रकाशित मिति: सोमबार, असोज १७, २०७३ १३:५३
प्रतिक्रिया दिनुहोस्