काठमाडौं । निर्मला पन्त हत्याकाण्डको अनुसन्धान गर्न गठित उच्चस्तरीय छानबिन समितिले मंगलबार (आज) गृहमन्त्री रामबहादुर थापालाई अध्ययन प्रतिवेदन बुझाउने भएको छ । कञ्चनपुरकी १३ वर्षीय किशोरी निर्मला पन्तको बलात्कारपछि हत्या भएको घटना छानबिनका लागि गृहका सह–सचिव हरिप्रसाद मैनालीको नेतृत्वमा गएको भदौ ७ गते उच्चस्तरीय समिति गठन गर्ने निर्णय भएको थियो ।
भदौ २५ मा १५ दिनका लागि समितिको म्याद थपिएको थियो । घटनाको अनुसन्धानमा देखिएको प्रहरी कमजोरी, विभिन्न व्यक्तिको बयान प्रतिवेदनमा उल्लेख गरिएको समितिका सदस्य वीरेन्द्र केसीले बताए । “देखिएका सबै कुरा उल्लेख भएका छन् । प्रहरीका विषयदेखि अन्य विभिन्न विषय छन् । सीसीटिभीका कुरा पनि छन्, सबै कुरा नभनौं,” केसीले भने ।
केसीले यसअघि समितिको कामप्रति असन्तुष्टि जनाउँदै राजीनामा दिएर पुनः फर्किएका थिए । प्रदेश नम्बर ७ को आन्तरिक मामिला तथा कानुन मन्त्रालयका उपसचिवसमेत रहेका केसीले भने, ‘‘यो प्रतिवेदनमा मेरो पनि पूरै सहमति छ ।’’ समितिले घटनाको अनुसन्धानमा प्रहरीले लापरवाही गरेको निष्कर्षसमेत निकालेको छ । गत साउन १० गते साथी रोशनी बमको घरमा गएकी निर्मला साउन ११ गते उखुबारीमा मृत अवस्थामा फेला परेकी थिइन् ।
समिति स्रोतका अनुसार निलम्बनमा परेका ६ प्रहरी अधिकृत बाहेक अरुलाई कारबाहीको सिफारिस गरिएको छैन । बलात्कारपछि निर्मलाको हत्या भएपछि कञ्चनपुरमा आन्दोलन चर्किएको थियो । हत्या भएको २४ औं दिनमा प्रहरीले दिलिपसिंह विष्टलाई सार्वजनिक गरेको थियो । दिलिपको डिएनले निर्मलाको शरीरमा भेटिएको पदार्थसँग मेल नखाएपछि उनी थुनामुक्त भएका थिए ।
दिलिप पक्राउ परेपछि चर्किएको आन्दोलनमा प्रहरीले गोली चलाउँदा शनि खुनाको ज्यान गएको थियो । प्रहरीले अहिले पनि अनुसन्धान जारी राखेको बताए पनि परिणामखुखी नतिजा भने आउन सकेको छैन ।