हङकङ । हङकङमा गत शुक्रबार हाइ प्रोफाइल डकैतीको आरोपमा एक जना नेपाली युवा पक्राउ परेका छन् । अन्य चार जना गहना पसलका कामदारलाई मासु काट्ने चक्कु प्रहार गरेर ७ लाख ८६ हजार अमेरिकी डलर नगद लिएर भागेको बताइएको छ ।  

कानुनी गतिविधि सञ्चालन गर्ने फर्म चलाएर बसेका २४ वर्षिय ती युवालाई स्थानीय याउ मा तेइको ब्याटरी स्ट्रीटमा शुक्रबार राति साढे ९ बजे प्रहरीले पक्राउ गरेको थियो । उनीसँग घटनाबारे सम्बन्धित कुनै सामग्री नभेटेको भएपनि थोरै परिमाणमा गाँजाजस्तो वस्तु फेला पारेको प्रहरीले जनाएको छ ।

ती युवालाई डकैती र खतरनाक लागु औषध प्रयोगको अभियोगमा सोमबार काउलोन सिटी अदालतमा पेश गरिएको बताइएको छ । उक्त घटनामा संलग्न अन्य अभियुक्तको बारेमा खोजी भइरहेको जनाइएको छ । प्रहरीले जनाएअनुसार भागेका व्यक्ति कम्तिमा तीन जना रहेको र उनीहरु दक्षिण एशियाली मूलका जस्ता देखिन्छन् ।

शुक्रबारको सो घटना पूर्वी होक युएन स्ट्रीटमा बिहान भएको थियो । घटनामा संलग्न युवाहरुले स्टोरका कामदारमाथि आक्रमण गरी दुई वटा ब्यागमा रहेको ७ लाख ४० हजार अमेरिकी डलर र हङकङ डलर ३ लाख ६३ हजार ६० समेत गरी ७ लाख ८६ हजार रकम तथा केही थान चेक समेत लुटेको आरोप लगाइएको छ । घटनामा स्टोरका केही कामदार घाइते भएका थिए । पक्राउ परेका नेपालीको परिचय भने खुलाइएको छैन ।