काठमाडौं । अघिल्लो महिनाको तुलनामा अगष्टमा नेपाल आउने बाह्य पर्यटकको संख्यामा वृद्धि भएको छ । १८.८ प्रतिशतले पर्यटकको संख्या वृद्धि हुँदा अगष्टमा ८७ हजार ६७९ पर्यटकले नेपाल भ्रमण गरेका छन् । 
जनवरीदेखि अगष्टसम्म हवाई मार्ग भएर ६ लाख ८० हजमर ९९६ पर्यटकले नेपाल भ्रमण गरेको नेपाल पर्यटन बोर्डले जनाएको छ । सन् २०१७ को जनवरीदेखि अगष्टसम्मको पर्यटन आगमनको तुलनामा यो १८.२ प्रतिशतको वृद्धि हो । 
अघिल्लो वर्षको अगष्टको तुलनामा भारतबाट आउने पर्यटकको संख्यामा ३७.३ प्रतिशतको वृद्धि छ भने श्रीलंकाबाट आउने पर्यटकको संख्यामा भने ठूलो वृद्धि भएको बोर्डले जनाएको छ । बोर्डका अनुसार श्रीलंकाबाट आउने पर्यटकको संख्यामा ७४.५ प्रतिशतले वृद्धि भएको
छ । समग्रमा सार्क राष्ट्रबाट आउने पर्यटकको संख्यामा ४८.३ प्रतिशतले वृद्धि आएको छ । 
चीनबाट आउने पर्यटकको संख्यामा रहेको वृद्धि पनि कायम छ । बोर्डका अनुसार चीनबाट आउने पर्यटकको संख्यामा वृद्धि ६३.३९ रहेको छ ।  

युरोपबाट आउने पर्यटकको संख्यामा २१.३ प्रतिशत वृद्धि छ भने अमेरिकाबाट आउने पर्यटकको वृद्धि १५ प्रतिशतमा सीमित छ । 

यता स्विडेनबाट भने नेपाल आउने पर्यटकको संख्यामा कमी आएको छ । गत वर्षको अगष्टमा ११५ जना स्विडेनका पर्यटक आएकोमा यो वर्षको अगष्टमा घटेर ८६ मा घटेको छ । यो प्रतिशतका हिसावले माइनस २५ प्रतिशत हो । 

सरकारले तुलनात्मक रुपमा धेरै पैसा खर्च गर्ने युरोप र अमेरिकन देशका पर्यटकको संख्या बढाउनु आवश्यक रहेको भनिरहेका बेला भारत र चीनको तुलनामा युरोप र अमेरिकाका पर्यटकको संख्यामा वृद्धि आउन सकेको छैन । 
हवाई मार्ग भएर आउने पर्यटकको संख्याको तथ्यांक पर्यटन बोर्डले राखे पनि स्थलमार्ग भएर आउने पर्यटकको आंकडा भने राख्ने गरेको छैन । संस्कृति, पर्यटन तथा नागरिक उड्डयन मन्त्रालयले स्थलमार्गबाट आएका पर्यटकको आंकडा नराखेको भन्दै पर्यटन बोर्डको आलोचना गर्दै आएको छ । नेपाल भारत सीमा नाका खुला भएकाले भारतबाट स्थलमार्ग हुँदै ठूलो संख्यामा पर्यटक नेपाल भित्रिने गरेको सरकारी अधिकारीहरुले नै बताउँदै आएका छन् । संस्कृति, पर्यटन तथा नागरिक उड्डयन मन्त्री रवीन्द्र अधिकारीले पर्यटन बोर्डका प्रमुख कार्यकारी अधिकृत दीपकराज जोशीलाई स्थलमार्गबाट आउने पर्यटकको तथ्यांक पनि राख्न निर्देशन दिइसकेका छन् । 

सरकारले सन् २०२० लाई नेपाल पर्यटन वर्षका रुपमा मनाउने घोषणा गरेको छ । २०–२० कार्यक्रम घोषणा गरेको सरकारले २०२० मा २० लाख पर्यटक हवाई मार्ग भएर भित्राउने लक्ष्य राखेको छ । सन् २०१७ मा ९ लाख ४० हजार पर्यटक नेपाल भित्रिएका थिए ।