नेपालले अन्तर्राष्ट्रिय क्रिकेटमा छोटो समयमै धेरै उपलब्धि हासिल गरेको छ । क्रिकेट एउटा यस्तो खेल बनेको छ, जसले सबै नेपालीलाई खुसी दिने र आफ्नो देशप्रति गर्व गर्नसक्ने बनाएको छ । यसका लागि नेपाली क्रिकेट टोली बधाईका पात्र छन् । नेपाल पहिलोपल्ट एक दिवसिय अन्तर्राष्ट्रिय खेल खेल्दैछ । यो ५० ओभरको एक दिवसीयमा विजयी हुने टिम एसिया कप क्रिकेटमा टेस्ट खेल्ने राष्ट्रहरूसँग प्रतिस्पर्धा गर्ने हुनाले अहिलेको प्रतियोगिताको अत्यन्त ठूलो महत्व छ ।
तर यस खेलमा नेपालले सोचेजस्तो प्रदर्शन गर्न सकेको छैन । शुरुका दुई खेल, ओमान तथा युएईसँग नेपालले लगातार पराजय बेहोरेको छ । नेपालले अझै तीन खेल खेल्न बाँकी छ, मलेसिया, सिंगापुर तथा हङकङसँग । यी तीनै खेलमा नेपाल विजयी हुनसक्यो र ओमान तथा युएईले उत्कृष्ट प्रदर्शन गर्न सकेनन् भने नेपालको अझैपनि फाइनल पुग्ने र एसिया कपमा भारत, पाकिस्तानजस्ता क्रिकेटका पावरहाउससँग प्रतिस्पर्धा गर्न पाउने आशा रहन्छ । नेपालको संभावनालाई सम्पूर्ण रुपमा नकार्न नसकेता पनि अहिलेको अवस्थामा आशा क्षीण भएको छ ।
ओमानसँग र युएईसँग दुवै खेलमा नेपाल बलिङ र ब्याटिङ दुवै पक्षमा स्पष्ट ढंगले कमजोर देखियो । यूएइसँगको खेलमा नेपालले शुरुमा धेरै विकेट ढाल्न नसकेका कारण प्रतिस्पर्धी टिम २५४ रनको राम्रो स्कोर बनाउन सफल भयो । आजको खेलमा बलिङभन्दा ब्याटिङ झनै कमजोर देखियो । अघिल्लो पंक्तिमा खेल्ने ब्याट्सम्यानले राम्रो जग बनाउन नसक्दा मध्यम क्रम र तल्लो स्थानबाट खेल्नेहरूले गरेको प्रयासले प्रतिफल दिएन । सुवास खकुरेलले ५० र दीपेन्द्र सिंह ऐरीले ४० रन बनाएका हुन् तर नेपालका भरपर्दा खेलाडी पारस खड्का, ज्ञानेन्द्र मल्ल तथा सागर पुनले क्रमशः १६, ४ र ३ रनमात्र बनाउन सफल भए ।
यस खेलमा नवौं स्थानमा आएका सोमपाल कामीले २७ तथा दशौं स्थानमा आएका बसन्तले १२ रन बनाएर हारको फरक कम गर्न सफल भए । बलिङमा सन्दीप लामिछाने राम्रै चले, उनले १० ओभरमा दुई मेडन ओभर फ्याँक्दै केवल २४ रन खर्चेर ४ विकेट लिए र तर अन्य बलरको प्रदर्शन त्यति सशक्त हुन सकेन । ओमानसँगको खेलमा नेपालले बनाएको २२१ रनको स्कोर त्यति ठूलो नभएता पनि नेपालले ५० ओभरको खेलमा त्यति खेलेकोमा कमजोर भन्नु हुँदैन । तर ओमानसँग नेपालको बलिङ अत्यन्त फितलो भयो । त्यसरी हेर्दा हामी बलिङ र ब्याटिङ दुवैमा कमजोर भयौं । कतिपय टिममा एउटा पक्ष कमजोर हुँदा अर्को पक्षले खेल जिताउने काम गर्छ, तर हाम्रो टिममा दुवै पक्षले राम्रैसँग खेल्दा मात्र गेम जित्ने देखियो ।
खेलमा एउटा प्रतियोगितालाई आधार बनाएर टिमलाई दोष दिने वा अत्यन्त प्रशंसा गर्नु सही होइन । तर, अब एक दिवसीय अर्थात् वान डे खेल्ने शुरुवात गरेको अवस्थामा अघि बढ्ने रणनीतिमा नेपालले राम्रै तयारी गर्नुपर्ने देखिन्छ । तयारीको शुरुवात क्रिकेट एसोसियसनको सशक्तताबाट हुनु पर्दछ । तर हाम्रो एसोसियसन सधै विवादमा आउने र खेलका लागि भन्दा आफ्नो निजी र आफ्नो समूहको स्वार्थका लागि सधैं बखेडा मच्चाउने नेतृत्व भएका कारणले पनि नेपालको क्रिकेट आफ्नो क्षमता अनुरुप अघि बढ्न नसकेको हो ।
खेलकुद व्यवस्थापन र प्रशासनको क्षमता अभिवृद्धि गरिनुपर्ने विषयमा दुई मत छैन । उता खेलाडीको विषयमा पनि निरन्तर निगरानी राखिनु जरुरी देखिन्छ । कुन खेलाडी कस्तो प्रकारको खेलका लागि सुहाउँदो छ, सोही अनुसार टिममा छनोटमा पारिनु पर्दछ । कुनै खेलाडी टि ट्वान्टीका लागि उपयुक्त छ भने ५० ओभरको म्याचमा उसलाई बेन्चमा बसाउन सक्नु पर्दछ । कुनैबेला नयाँ खेलाडीले प्रतिभा देखाउने संभावना देखियो भने पुरानालाई रेस्ट गराउन पनि क्याप्टेन र म्यानेजर तत्पर हुनु पर्दछ । नेपालको लागि क्रिकेट एक खेल भन्दा माथि एकताको सूत्र तथा गर्व गर्ने आधार हुँदै गएको परिप्रेक्ष्यमा सरकारले यस खेलको संवद्र्धन र विकासमा अझ बढी ध्यान पुर्याउन जरुरी देखिन्छ ।