देश
सिन्धुपाल्चोक । तातोपानी आसपासमा भारी बर्षा हुँदा भोटेकोसीमा दशकयताकै ठूलो बाढी आएको छ । बाढीले एक स्कुलसहित करिब सय मिटर सडक बगाएको हाम्रा सम्बाददाता सुरेश बुढाथोकीले जनाएका छन् ।
नदीले मानसरोवर बोर्डिङ स्कुल बगाउनुको साथै कोदारी राजमार्गको ५० मिटर र जुरे–लामासाँघु अन्तर्गतको ५० मिटर सडक बगाएको उनले बताएका हुन् ।
त्यस्तै बाढीले लिपिङमा १५ घर र तातोपानी भन्सारमा रहेको २ वटा ट्रिपर बगाएको जिल्ला प्रहरी प्रमुख रविन्द्र श्रेष्ठले जानकारी दिए ।
बाढीले तातोपानी भन्दा माथि रहेको झिर्पु बजार बगाउनुको साथै थुप्रै पसलहरूमा क्षति पुर्याएको छ ।
“नदीमा पानीको सतहमा केही कमी आए पनि स्थानीयबासी त्रसित र भयभित देखिएका छन् । उनीहरूलाई सुरक्षित स्थानमा जान प्रहरीले माइकिङ गरिरहेको छ,” उनले भनले भने, “ठाउँ ठाउँको सडकखण्ड बाढीले बगाएकाले सुरक्षाकर्मी र प्रशासनले बस्तु अवस्था बुझ्न सकेको छैन ।”
उनका अनुसार प्रमुख जिल्ला अधिकारी गोकर्णमणी दुवाडी र जिल्ला प्रहरी प्रमुख श्रेष्ठसहितको टोली जुरेमा अड्किएको छ ।
“केन्द्रबाट हेलिकप्टर मगाएर तातोपानी र त्यसभन्दा माथिका स्थानमा जानेकी भन्ने कुरा भइरहेको छ,” बुढाथोकीले बताए ।
सशस्त्र प्रहरी सीमा सुरक्षाबलसँग सम्पर्क हुन नसक्दा क्षतिको विस्तृत विवरण पाउन नसकिएको उनको भनाइ छ । नदीले ग्यासका सिलिन्डर, लत्ता कपडा र भाँडा बर्तन बगाएर ल्याएकाले पनि थुप्रै घर बगाएको हुन सक्ने उनले अनुमान गरे ।
बाढीले बाह्रबिसेमा रहेको प्लाइउड फम, ब्लक उद्योगमा क्षति पुर्याएको प्रहरीले बताएको छ । मोटर ग्यारेजबाट टाटासुमो र जिप बगाउनुको साथी मार्पिङ र लिपिङ जोड्ने मध्यभोटेकोसीको बेलिव्रिज पनि बाढीले बगाएको स्थानीयले बताएका छन् ।
बाढीमा परि हालसम्म कुनै मानवीय क्षति नभएको प्रहरीको भनाइ छ । बाढीका कारण तातोपानी दशकिलोका केही घरहरू जोखिममा छन् । यसैगरी जुरे पहिरोमा ब्लक छ । तटीय क्षेत्रका बासिन्दाहरूलाई सुरक्षित स्थानमा जान प्रहरीले माइकिङ गरिरहेको छ ।
प्रकाशित मिति: बुधबार, असार २२, २०७३ १२:१९
प्रतिक्रिया दिनुहोस्