मोरङ । सर्वसाधारणलाई सहुलियतमा स्वास्थ्य सेवा दिइरहेको कोशी अञ्चल अस्पताल विराटनगरमा स्वास्थ्य मन्त्रालयको कर्मचारी प्रशासन महाशाखाले दरबन्दीअनुसार विशेषज्ञ चिकित्सक नपठाउँदा समस्या भइरहेको छ । दरबन्दी पूर्ति हुन नसक्दा ११ औं तहका विशेषज्ञ (कन्सलटेन्ट) चिकित्सकको सेवा ८ औं तहका मेडिकल अफिसरले दिनुपर्ने बाध्यता रहेको छ । दरबन्दीअनुसार चिकित्सक नहुँदा सेवा प्रवाहमा समस्या भइरहेको अस्पतालले जनाएको छ । कोशीमा ११ औं तहका विशेषज्ञ (कन्सलटेन्ट) ४० र मेडिकल अफिसर ३४ गरेर ७४ जना चिकित्सकको दरबन्दी छ ।
अस्पतालका मेडिकल सुपरिटेन्डेन डा. रोशन पोखरेलले ४० जनाको दरबन्दी रहे पनि ११ औं तहका कन्सलटेन्ट चिकित्सक आधा पनि नरहेको बताए ।
८ औं तहका मेडिकल अफिसर पनि ३० जना मात्रै छन् । मेसु पोखरेलका अनुसार दरबन्दी विशेषज्ञ चिकित्सकको भए पनि अस्पताल विकास समितिबाट मेडिकल अफिसरलाई नियुक्ती गरेर सेवा दिनु परिरहेको छ ।
उनले कन्सलटेन्टको दरबन्दी रहेका ठाउँमा मेडिकल अफिसरलाई करारमा अस्पताल विकास समितिबाट नियुक्ती दिएर काममा लगाउनुपर्ने अवस्था रहेको बताए ।
कन्सलटेन्टको सेवा मेडिकल अफिसरले दिइरहनु पर्दा बिरामीले पाउने स्वास्थ्य सेवामा पनि समस्या हुने गरेको उनको भनाइ छ ।
पोखरेलले अस्पताल विकास समितिबाट ११ औं तहका विशेषज्ञ १० र १४ जना मेडिकल अफिसर गरेर २४ जना चिकित्सक करारमा नियुक्त भएका छन् । उनीहरुको सबै खर्च अस्पताल विकास समितिले नै बेहोर्नुपर्छ ।
सरकारले विभिन्न सेवा थप गर्दै औजार र उपकरण पठाउने गरे पनि दक्ष चिकित्सक नहुँदा सेवा प्रवाहमा समस्या भइरहेको अस्पतालले जनाएको छ ।
अस्पताल विकास समितिका अध्यक्ष डा. आरएल करुवाले सरकारले दरबन्दीअनुसार चिकित्सक नपठाउँदाको भार विकास समितिको थाप्लोमा आउने गरेको बताए ।
अस्पतालको आन्तरिक आम्दानीले खर्च धान्न छाडिसकेको बताउँदै उनले करारमा राखिएका चिकित्सक र कर्मचारीलाई समयमा तलव खुवाउन नपाएर समस्या पर्न थालेको जानकारी दिए ।
