काठमाडौं । पूर्वडीआईजी नवराज सिलवाललाई खोज्न ललितपुरको भट्टेडाँडा पुगेको प्रहरी रित्तोहात फर्किएको छ । 

बढुवाका लागि कार्यसम्पादन मूल्यांकन (कासमू) कीर्ते गरेको अभियोगमा छानबिन गर्न खोजेदेखि नै फरार रहेका सिलवाल ललितपुरको भट्टेडाँडामा रहेको आशंकामा प्रहरी आइतवार भट्टेडाँडा पुगेर सो क्षेत्रमा छापा मारेको थियो ।

महानगरीय प्रहरी परिसर ललितपुरबाट डीएसपीको कमान्डमा १ सय ६५ जनाको टोली आईतबार बिहानै भट्टेडाँडा पुगेको थियो । 

भट्टेडाँडामा दिनभर सर्च गरेपनि सिलवाल नभेटिएपछि प्रहरी टोली साँझ फर्किएको थियो ।

महानगरीय प्रहरी परिसर ललितपुरका डीएसपी नरेन्द्र चन्दले भने, “सिलवाल भट्टेडाँडा छन् भन्ने आशंका भएपछि उनको खोजीका लागी टोली गएको थियो तर भेटिएनन् ।”