काठमाडौं । त्रेता युगमा भएको राम सिताको विवाहको सम्झनामा जनकपुरमा विवाह पञ्चमी महोत्सव मनाइएको छ ।
बिहीबार अपरान्ह २ बजेपछि जानकी मन्दिरबाट बाजा–गाजा, लावा–लस्करसहित निस्किने जानकीको डोला तथा राम मन्दिरबाट निस्किने रामको डोलाबीच ऐतिहासिक रंगभूमि बाह्रविघा मैदानमा विवाह पञ्चमी महोत्सवको मनाइएको हो ।
त्रेतायुगमा राम–जानकीबीच यसै मैदानमा स्वयम्वर भएको विश्वास छ । विवाह महोत्सवमा नेपाल र भारतका विभिन्न स्थानबाट दुई लाख अधिक श्रद्धालु सहभागी भएको दाबी जानकी मन्दिरका छोटे महन्थ रामरोशन दासको छ ।
यस वर्ष जाडो त्यति नभएको तथा धानको उत्पादन पनि राम्रो भएको कारण श्रद्धालुहरुको संख्यामा वृद्धि भएको छोटे महन्थ दासले बताए ।
साँझ जानकी मन्दिरमा आयोजना गरिएको विवाह मण्डपमा विवाह हुने गर्दछ । सीता स्वयम्बरमा विभिन्न व्यक्तिहरुको सहभागिता रहेको थियो । राम मन्दिरका महन्थ राम गिरी र जानकी मन्दिरका महन्थ राम तपेश्वर दासको नेतृत्वमा स्थानिय रंगभुमि मैदानमा भगवानको डोला पुगेर त्यहाँ स्वयम्बर गरिएको थियो । त्यस अवसरमा लाखौको संख्यामा श्रद्धालुहरुको सहभागिता रहेको थियो ।
मेला भर्न आएका श्रद्धालुहरुको आवास तथा भोजनको व्यवस्था विभिन्न समाजसेवी संघ संस्थाहरुले गरेका छन् । स्टेशन एरिया युवा क्लबका सदस्यहरुले श्रद्धालुहरुको लागी आवास तथा भोजनको व्यवस्था समेत गरेका छन् ।
साताव्यापी रुपमा मनाइने रामजानकी विवाह महोत्सवमार्फत् मिथिलाको वैवाहिक विधि विधानलाई पनि उद्घघाटित गरिन्छ । जनकपुरमा हरेक वर्ष विवाह पञ्चमी महोत्सव मनाउने गरिन्छ ।
