साहित्य
एजेन्सी । अघिल्लो साता भारतीय अभिनेता साहरुख खानले लस एन्जलस ल्याक्स विमानस्थलमा पक्राउ परेको भन्दै ट्विट गरे–यो घटना समाचारको शीर्षक बन्यो । बलिउड अभिनेताले अमेरिकी अध्यागमन अधिकारीबाट यस किसिमको व्यवहार सामना गर्नुपरेको यो पहिलोपल्ट होइन, तेस्रो पटक हो ।
प्रवेश पूर्व साह रुख खानलाई किन र कति समय पक्राउ गरेर राखियो भन्ने विषय अझै पनि स्पष्ट भएको छैन । तर यस घटनाले कति भारतीय सेलिब्रेटीहरुले अमेरिका भ्रमण गर्दा विगतका समयमा यस किसिमको व्यवहार सामना गर्नुपरेको छ भन्ने विषयमा प्रश्न उठाएको छ ।
तर केही समयपछि अमेरिकी अध्यागमन विभागले माफी पनि माग्यो । तर किन भारत र अन्य देशबाट आउने उच्च ओहदाका मानिसलाई यसरी पक्राउ गरिन्छ भन्ने विषयमा जानकारी दिइएन । यस किसिमको सुरक्षा कडाइको सामना गर्नेमा भारतीय मात्रै पर्दैनन् । मध्यपूर्वबाट भ्रमण गर्नेले पनि यस किसिमको अवस्थाको सामना गर्दै आएका छन् ।
२०१३ मा प्यालेस्टिनी चलचित्र निर्माता इमाद बर्नाट र उनको परिवारलाई पनि ल्याक्स विमानस्थलमा पक्राउ गरिएको थियो । उक्त समयमा उनले आफू एकेडेमी अवार्डका लागि गएको प्रमाणित गर्नुपरेको थियो ।
२०१४ मा आउटलुकलाई दिएको अतिथि लेखमा साहरुख खानले अमेरिकी अध्यागमन अधिकारीहरुले २००९ को सोधपुछमा आफ्नो थरको बारेमा प्रश्न गरिएको बताएका थिए । उक्त समयमा उनलाई न्यू जर्सीको नेवार्क विमानस्थलमा पक्राउ गरिएको थियो । थर खान भएकै कारण अन्यलाई पनि यसै किसिमको व्यवहार गरिन्छ कि भन्ने विषयमा आफू अचम्मित भएको उनले बताए ।
सुपरिचित भारतीय अभिनेता इरफान खान, जो बारम्बार बलिउड र हलिउड गरिरहन्छन्, उनलाई पनि अमेरिकामा २ पटक पक्राउ गरिएको थियो । उनलाई २००८ मा लस एन्जलसमा आइपुग्दा पहिलो पटक र पछि न्यूयोर्कमा पनि पक्राउ गरिएको थियो ।
२००९ को घटनालाई स्मरण गराउँदै खानलाई उधृत गर्दै हिन्दुस्तान टाइम्सले लेखेको छ,“म क्रोधित भए” । उनले भने,“मलाई चुपचाप कोठामा बोलाइयो र प्रश्न गरियो र परिचयको प्रमाणिकरण गरियो । मलाई कुरा गर्न अनुमती दिइएन । मलाई किन यस्तो किसिमको व्यवहार गरियो भनेर सोध्दा मलाई चुप लाग्न भनियो ।”
उनलाई फोन प्रयोग गर्न पनि दिइएन । उनीहरुले भने चुप लागेर बस । आफ्नो नाम इरफान भएकै कारण उनीहरुले यसो गरेको उनी बताउँछन् ।
यसैगरी भारत–चीनको सह उत्पादन ‘द जुकिपर’ मा काम गर्न तोकिइसकेका बलिउडका सुपरिचित निर्देशक कबिर खानलाई पनि २ पटक प्रश्न गरियो । पहिलो घटना ९÷११ को लगत्तै २००१ मा भएको थियो । उक्त समयमा उनी लस एन्जलसबाट वासिङटनको उडानमा गएका थिए । उनले अर्का यात्रुसँग हिन्दीमा कुरा गरिरहेका थिए । यसैबीच केही यात्रुले अचम्म लाग्दो भाषामा कुरा गरेको भन्दै गुनासो गरे र एफबीआईका एजेन्ट आए । “जब उनीहरुले मेरो नाम थाहा पाए, तब उनीहरुले मलाई २ घन्टा भन्दा बढी अवधि सोधपुछ गरे । उनीहरुले मेरो नामको सम्बन्ध आतंकवादसँग भए वा नभएको खोजी गरे र त्यसपछि मात्रै मलाई उड्न दिए,” उनले भने ।
मुश्लिमसँग मिल्दोजुल्दो नाम भएकैले फिल्म निर्माता कमल हसनले पनि यस्तै व्यवहारको सामना गर्नुपरेको छ ।
सेलिब्रेटीबाहेक पूर्व भारतीय राष्ट्रपति ए पी जे अब्दुल कलामले पनि यस्तै व्यबहारको सामना गर्नु परेको छ । उनले न्यूयोर्कको जोन एफ केनेडी विमानस्थलमा २०११ मा यस किसिमको व्यवहारको सामना गर्नुपरेको थियो ।
प्रकाशित मिति: आइतबार, भदौ ५, २०७३ ०८:५४
प्रतिक्रिया दिनुहोस्