काठमाडौं । सरकारले आइतबार संसद्मा प्रस्तुत गरेको आउँदो आर्थिक वर्ष २०७९/८० को बजेटप्रति अर्थविद्हरूले मिश्रित प्रतिक्रिया दिएका छन् ।

अर्थविद् केशव आचार्यले बजेटको ‘ओरियन्टेसन’ राम्रो रहेको बताए । तर, बजेटले लक्षित गरेको आर्थिक वृद्धि र मूल्यवृद्धिको लक्ष्य भने महत्त्वाकांक्षी भएको उनले बताए ।

“बजेटको प्राथमिकतामा विमति जाउनुपर्ने कारण छैन । कृषि, उद्योग, पर्यटन प्राथमितामा पर्नुपर्छ भन्ने चाहेकै कुरा हो,” उनले भने, “तर, ८ प्रतिशत आर्थिक वृद्धि महत्त्वाकांक्षी छ ।”

उनले रुस–युक्रेनको युद्धका कारण मूल्यवृद्धिमा चाप पर्न सक्ने पनि बताए । सरकारले आउँदो आर्थिक वर्षमा मूल्यवृद्धि ७ प्रतिशतमा सीमित राख्ने लक्ष्य लिएको छ ।

अर्का अर्थशास्त्री डा. डिल्लीराज खनालले बजेटले अर्थतन्त्रलाई सकारात्मक दिशा दिन नसकेको प्रतिक्रिया दिए । उनले भने, “बजेट चुनावमुखी भयो । आर्थिक स्थिरता खलबल्याउने खालको बजेट हो यो । यसले स्पष्ट दिशा लिन पनि सकेन ।”