काठमाडौं । दिल्ली क्यापिटल्स शनिबार राति मुम्बई इन्डियन्ससँग पराजित भएपछि रोयल च्यालेन्जर्स बैंगलोरले इन्डियन प्रिमियर लिग (आईपीएल)को प्ले अफमा स्थान पक्का गरेको छ । 

यससँगै आईपीएलमा प्लेअफ समीकरण पूरा भएको छ । १४ खेलबाट २० अंक जोडेको गुजरात टाइटन्स शीर्ष स्थानमा रहँदा समान १८ अंक जोडेको राजस्थान रोयल्स दोस्रो र लखनउ सुपर जायन्ट तेस्रो स्थानमा छन् । १६ अंक जोडेको बैंगलोरले चौथो स्थानमा रहेर प्लेअफमा स्थान पक्का गरेको हो । 

प्लेअफको पहिलो क्वालिफायर गुजरात र राजस्थानले प्रतिस्पर्धा गर्नेछन् । इलिमिनेटरमा लखनउ र बैंगलोरबीच प्रतिस्पर्धा हुनेछ । गुजरात र राजस्थानबीचको विजेताले सिधै फाइनलमा स्थान बनाउनेछ भने पराजित हुनेले लखनउ र बैंगलोरबीचको विजेतासँग प्रतिस्पर्धा गर्नेछ । 

मुम्बईको वाङ्खडे रंगशालामा मुम्बईले टस जितेर फिल्डिङ गर्ने निर्णय गरेको थियो । त्यसपछि ब्याटिङ गरेको दिल्लीले निर्धारित २० ओभरमा सात विकेट गुमाएर १५९ रन बनाएको थियो । १६० रनको लक्ष्य मुम्बईले १९.१ ओभरमा पाँच विकेट गुमाएर पूरा गरेको हो । 

दिल्लीका एनरिच नोर्ट्सजे र शार्दुल ठाकुरले समान दुई विकेट लिए । कुलदीप यादवको नाममा एक विकेट रह्यो । 

त्यसअघि, दिल्लीका लागि रोमभन पोवेलले ४३, रिशब पन्तले ३९, पृथ्वी शाले २४, अक्सर पटेलले अविजित १९ र सरफराज खानले १० रन बनाएका थिए । अन्यले दोहोरो अंकमा रन बनाउन सकेनन् । 

मुम्बईका जसप्रित बुमराहले तीन विकेट लिए । रमनदीपले दुई विकेट लिँदा ड्यानिल साम्स र मयांक मारकन्डेले एक एक विकेट लिए । 

मुम्बई यसअघि नै प्लेअफबाट बाहिरिसकेको थियो । मुम्बईले लिग पुछारमा रहेर आईपीएलको अन्त्य गरेको छ । मुम्बईसँगै चेन्नई सुपर किंग्स, सनराइजर्स हैदरावाद, पञ्जाब किंग्स र कोलकाता नाइट राइडर्स पनि प्लेअफमा स्थान बनाउन असफल रहे ।