काठमाडौं । सहिद स्मारक ‘बी' डिभिजन लिग फुटबलअन्तर्गत शनिबार श्री भगवती क्लब विजयी भएको छ । बाँसबारी युथ क्लब र टुसाल युथ क्लब तथा वीरगन्ज युनाइटेड र नयाँबस्ती युथ क्लब बराबरीमा रोकिएका छन् ।

श्री भगवतीले लगातार दोस्रो जित हासिल गर्नेक्रममा ब्वाइज युनियन क्लबलाई २–१ ले हरायो । ब्वाइज युनियनले लिएको सुरुआती अग्रता जोगाउन नसक्दा श्री भगवतीलाई २–१ को नतिजा सुम्पिन बाध्य भएको हो ।

ललितपुरस्थित अखिल नेपाल फुटबल संघ (एन्फा) मुख्यालयको मैदानमा बाँसबारी र टुसालले गोलरहित बराबरी खेले । वीरगन्ज र नयाँबस्ती २–२ को बराबरीमा रोकिए ।

लिगमा आइतबार पनि तीन खेल हुनेछन् । १४ क्लबबीच सिंगल राउन्ड रोबिन लिगका आधारमा प्रतिस्पर्धा भइरहेको छ । शीर्ष दुई टोेली 'ए' डिभिजन लिगमा बढुवा हुनेछन् । पुछारका दुई टोली रेलिगेसनमा पर्नेछन् ।