धनगढी । सुवास ऐयरको अर्धशतकप्रेरित लिटिल फ्लावर स्कुलले बिहीबार यू–१९ विद्यालयस्तरीय धनगढी मेयर लिटल फ्लावर प्रिमियर लिगमा स्टेपिङ स्टोनलाई ६१ रनले पराजित गरेको छ । आजै सम्पन्न अर्को खेलमा हेलिल्यान्ड इङ्लिस स्कुल अत्तरियाले शारदा सरस्वती स्कुललाई २ विकेटले पराजित गरयो । 

धनगढीस्थित संघीय प्रहरीको खेल मैदानमा टस हारेर ब्याटिङका लागि निम्त्याइएको लिटल फ्लावरले निर्धारित २० ओभरमा ८ विकेट गुमाएर १६२ रन बनाएको थियो । १६३ रनको लक्ष्य पछ्याएको स्टेपिङ स्टोनले ७ विकेट गुमाएर ९१ रनमात्र बनाउन सक्यो । 

स्टेपिङ स्टोनका आयुब चन्दले सबभन्दा धेरै ३२ रन बनाए । विशाल बिष्ट र भुपेश जोशीले समान १४ रन बनए । लिटल फ्लावरका अनुराग सिंहले दुई विकेट लिए । प्रकाश जैसी, सुवास ऐयर र नरेन भट्टले एक एक विकेट लिए ।

त्यसअघि लिटल फ्लावरका लागि सुवासले ६७ रन बनाए । सुवासले ८ चौका र ४ छक्का प्रहार गरे । अनुराग सिंहले १३ तथा अनिल थापा र पुस्कर बडुले समान १२ रन बनाए । स्टेपिङ स्टोनका बिरेन्द्र चन्द र आयुबले समान दुई विकेट लिए । दिनेश ओडको नाममा एक विकेट रह्यो । 

आजै सम्पन्न पहिलो खेलमा होलिल्याण्डले दोधारा चाँदनीको शारदा सरस्वती स्कुललाई २ विकेटले पराजित गर्‍यो ।

टस जितेर ब्याटिङ गरेको शारदा सरस्वतिले १८.३ ओभरमा सबै विकेट गुमाएर ७४ रन बनाएको थियो । ७५ रनको लक्ष्य होलिल्याण्डले १६.२ ओभरमा ८ विकेट गुमाएर पूरा गरेको थियो । 

होलिल्यान्डका लागि अभिषेक पालले सबैभन्दा धेरै २२ रन बनाए । स्रञ्जय बोहराले अविजित १० रन बनाए । शारदा सरस्वतीका हेमन्त धामी, गणेश बिटालु र विकाश सुनारले समान दुई विकेट लिए । 

शारदा सरस्वतीका लागि विकाश सुनारले सबभन्दा धेरै ११ रन बनाए । निरज तेज चन्द र मिलन बोहराले समान १० रन बनाए । होलील्यान्डका सन्जय बोहराले तीन विकेट लिए । अविनारायण कोइराला, गजेन्द्र बोहरा र श्याम साउदले समान दुई विकेट लिए । 
प्रतियोगितामा शुक्रबार पनि दुई खेल हुनेछन् । पहिलो खेलमा गुरुकुल र सत्यवती एकेडेमी तथा दोस्रो खेलमा सैनिक आवासीय र होलिल्यान्ड प्रतिस्पर्धा गर्नेछन् ।