काठमडौं । ओमान भ्रमणका क्रममा डेभ वाट्मोरले राजीनामा दिएपछि नेपाली राष्ट्रिय क्रिकेट टोली प्रशिक्षकविहीन भयो । त्यसको एक महिनापछि क्यानले मुख्य प्रशिक्षकका लागि दरखास्त आह्वान गर्‍यो । नेपाली टोलीको प्रशिक्षकमा ६० जनाले रुचि देखाए ।

क्यानले ६० बाट पहिलो चरणमा १५ जनालाई छान्यो । १५ बाट पाँच प्रशिक्षक छनोट गर्दै अन्तर्वार्ता लिइयो । मुख्य प्रशिक्षकको अन्तिम निर्णय हुन बाँकी छ ।

यी हुन् सम्भावित तीन प्रशिक्षक
पुबुदु दसानायके
पुबुदु दसानायके नेपाली क्रिकेटका लागि नौलो नाम होइन । नेपाली क्रिकेट टोलीको हालको सफलतालाई पछाडि फर्केर हेर्दा उनको पनि ठूलो योगदान छ ।

सन् २०११ देखि २०१५ सम्म नेपालका मुख्य प्रशिक्षकको भूमिका निर्वाह गरेका उनलाई फेरि नेपाली प्रशिक्षकको मुख्य रोजाइको रूपमा हेरिएको छ ।

नेपाली क्रिकेट र क्रिकेट खेलाडीका विषयमा राम्रो ज्ञान राखेका पुबुदु हाल क्यानले अन्तर्वार्ता लिएकामध्येका एक हुन् । पुबुदु प्रशिक्षक भएकै समयमा नेपालले सन् २०१४ मा आईसीसी ट्वान्टी–२० विश्वकप खेलेको थियो । क्यानडा र अमेरिकाको प्रशिक्षकका रूपमा काम गरिसकेका पुबुदु हाल नेपाली टोलीको मुख्य प्रशिक्षका लागि मुख्य दाबेदार मानिन्छन् ।

मोन्टी देशाई
डेभ वाट्मोर नेपालको प्रशिक्षक बन्ने चर्चा चल्नुअघि नै देशाई पनि नेपाली टोलीको प्रशिक्षकका लागि चर्चामा थिए । तर, उक्त समयमा देशाई क्यानको रोजाइमा परेनन् । नेपाली क्रिकेटबारे राम्रो जानकारी राखेका देशाईले सन् २०१७ मा नेपाली यू–१९ पुरुष राष्ट्रिय क्रिकेट टोलीको ब्याटिङ प्रशिक्षकका रूपमा काम गरेका थिए ।

देशाईले सन् २०१५ मा राष्ट्रिय क्रिकेट टोलीका लागि पनि काम गरे । देशाईले यसअघि क्यानडाको राष्ट्रिय टोलीमा मुख्य प्रशिक्षकको भूमिका निर्वाह गरेका थिए ।

टेस्ट टोली वेस्ट इन्डिजका लागि पनि देशाईले मुख्य प्रशिक्षकको भूमिका निर्वाह गरिसकेका छन् । लामो समय क्रिकेट प्रशिक्षकको अनुभव बटुलेका देशाई पनि हाल नेपाली राष्ट्रिय क्रिकेट टोलीको प्रशिक्षकका लागि मुख्य दाबेदार हुन् ।

ग्रान्ट ब्राडवर्न
ग्रान्ट ब्राडवर्न न्युजिल्यान्डका पूर्वखेलाडी हुन् । न्युजिल्यान्डका पूर्वप्रशिक्षक ब्राडवर्न नेपाली राष्ट्रिय क्रिकेट टोलीको प्रशिक्षकका दाबेदार हुन् ।

सन् २०१४ मा स्कटल्यान्डको मुख्य प्रशिक्षक रहेका ब्राडवर्न योपटक क्यानले छनोट गरेका पाँच प्रशिक्षकमध्येका एक हुन् ।

ब्राडवर्नले पाकिस्तानको राष्ट्रिय क्रिकेट टोलीको फिल्डिङ प्रशिक्षकका रूपमा पनि काम गरिसकेका छन् । उनी सन् २०१८ देखि २०२१ सम्म पाकिस्तान राष्ट्रिय क्रिकेट टोलीको फिल्डिङ प्रशिक्षक रहे । ब्राडवर्न न्युजिल्यान्ड यू–१९ राष्ट्रिय क्रिकेट टोलीको पनि प्रशिक्षक रहिसकेका छन् ।

यी तीनसँगै अन्तर्वार्ता लिइएका अशंखा गुरुसिंह र रुवान कल्प पनि सम्भावित प्रशिक्षक हुन् ।