काठमाडौं । आगामी चार दशकमा विश्वभर दृष्टिविहीनको संख्या ३ गुणाले बढ्ने एक अनुसन्धानबाट फेला परेको छ ।

ल्यानसेट ग्लोबल हेल्थमा प्रकाशित एक अध्ययन रिपोर्टअनुसार विश्वभर सन् २०५० सम्ममा दृष्टिविहीनको संख्या ३ करोड ६० लाखबाट ११ करोड ५० लाख पुग्ने देखिएको छ ।

तर स्वास्थ्य चेतनामा वृद्धि र सुधारमा केन्द्रित भएमा उक्त जोखिम कम हुने अनुसन्धानकर्ताहरुको सुझाव छ ।

विश्वमा रहेका मानिसहरुको उमेर पनि बढ्दै गएकाले यो संख्या पनि बढ्दै गएको अनुसन्धानकर्ताहरुको दाबी रहेको बीबीसीले जनाएको छ ।

अहिलेको परिप्रेक्षमा पनि दक्षिण एसिया र अफ्रिकी क्षेत्रमा दृष्टिविहीनको संख्या बढिरहेको उक्त रिपोर्टमा उल्लेख छ ।

१८८ वटा देशका करिब २० करोड मानिसमा गरिएको परीक्षण र अनुसन्धानपछि उनीहरुमा दृष्टि सम्बन्धि सामान्यदेखि गम्भीर किसिमका समस्या फेला परेको देखिएको छ । सन् २०५० सम्म दृष्टिसम्बन्धि समस्या ५५ करोडसम्म पुग्ने अनुमान गरिएको छ ।

“कुनै पनि मानिसमा सामान्य किसिमको दृष्टि दोष देखियो भने पनि यसले जीवनभर प्रभाव पार्छ,” एंगिला रसकिन विश्वविद्यालयका प्रोफेसर रुपर्ट ब्रोउनले भने ।

“उदाहरणको लागि हामी उनीहरुको निर्भिकतामाथिको कमीलाई नै लिन सक्छौं । सामान्य दृष्टिदोष भएका मानिसले आफैं गाडी समेत चलाउन सक्दैनन्,” उनले भने । 
यो क्रमलाई रोक्नको लागि क्याट्या¥याक्ट सर्जरी र मानिसहरुले उपयुक्त चश्माको प्रयोग गर्नुपर्ने अनुसन्धानले सुझाव दिएको छ ।

दृष्टिदोषबाट प्रभावित जनसंख्याः

दक्षिण एसियामा १ करोड १७ लाख

पूर्वी एसियामा ६२ लाख

दक्षिण–पूर्वी एसिया ३५ लाख

अफ्रिकाको सहारा क्षेत्रको ४ प्रतिशत जनसंख्या

पश्चिम युरोपको कुल जनसंख्याको शुन्य दशमलव पाँच प्रतिशत जनसंख्या