बीबीसी । पूर्वराष्ट्रपति डोनाल्ड ट्रम्पले ‘ट्रुथ सोसल’ नामक नयाँ सोसल मिडिया नेटवर्क लन्च गर्ने घोषणा गरेका छन् । उनले आफ्नो यो संजाल फेसबुक, ट्वीटर जस्ता ठूला प्राविधिक कम्पनीहरुको विरुद्धमा खडा हुने बताएका छन् जसले अमेरिकामा विपक्षी आवाजलाई शान्त पारिरहेको उनको आरोप छ । 

ट्रम्प राष्ट्रपतिका रुपमा निर्वाचित हुनमा सामाजिक संजालको पनि अधिक महत्वपूर्ण भूमिका रहेको छ । र पदभार गरिसकेपछि पनि उनले समर्थकहरुसँग कुरा गर्न अनि आफ्ना राजनीतिक धारणा प्रस्तुत गर्न सामाजिक संजालकै प्रयोग गर्ने गर्दथे । 

तर जनवरी ६ मा भएको अमेरिकी संसद हमला पश्चात् फेसबुक, ट्वीटर लगायत सबै प्रमुख सामाजिक संजाल प्लेटफर्मले उनको अकाउन्टमाथि प्रतिबन्ध लगाएका हुन् । उनका पोस्टहरु धम्कीपूर्ण, हिंसा भड्काउने र अपमानजनक हुने गरेको थियो ।

उनीमाथि प्रतिबन्ध लगाउनु अगाडि नै फेसबुक र ट्वीटरले धेरैपटक उनका पोस्टहरु डिलिट गरिदिने अनि गलत सूचना फैलाइरहेको भन्ने चेतावनीको लेबल लगाउने गरेका थिए । कोरोना भाइरस सम्बन्धी उनका धेरै पोस्टहरु गलत ठहर गरिएका थिए । 

उनले भनेका छन्, “ हामी यस्तो दुनियाँमा बस्छौँ जहाँ ट्वीटरभरि तालिबानको भारी उपस्थिति छ तर तपाईँहरुलाई सबैभन्दा मनपर्ने राष्ट्रपतिको चाहिँ बोली खोसेर शान्त पार्न खोजिएको छ । ” 

यसअघि उनले डेस्क अफ डोनाल्ड ट्रम्प भन्ने ब्लग पनि लन्च गरेका थिए । तर सञ्चालनको एक महिना नहुँदै सो वेबसाइट स्थाइ रुपमा बन्द भएको थियो । 

ट्रुथ सोसल अर्को महिना नै ग्राहकहरुका लागि खुला हुने उनले बताएका छन् । २०२२ को पहिलो तीन महिना यो देशव्यापी रुपमा सञ्चालन गरिने भनिएको छ । ट्रम्पले थप भनेका हुन्, “सबैले मलाई सोधिरहन्छन् कि ठूला प्राविधिक कम्पनीको विरुद्धमा किन कोही उठ्दैन ? अब म भन्न सक्छु, हामी आफैँ यसतर्फ छिटै खडा हुनेछौँ । ”

तर ट्रम्पले भनेजसरी ट्वीटर र फेसबुक जस्ता प्लेटफर्मलाई प्रतिस्पर्धा गर्ने नेटवर्क सजिलै स्थापित गर्न नसकिने प्राविधिक विद्हरुले बताएका छन् ।