काठमाडौं । एसियाली विकास बैंक (एडीबी) ले चालु आर्थिक वर्ष २०७८/०७९ मा नेपालको आर्थिक वृद्धि ४.१ प्रतिशत हुने प्रक्षेपण गरेको छ । बैंकले बुधबार एसियन डेभलपमेन्ट आउटलुक सार्वजनिक गर्दै बैंकले चालु वर्षमा नेपालको आर्थिक वृद्धि ४.१ प्रतिशत हुने प्रक्षेपण गरेको हो ।

सरकारले भने चालु आर्थिक वर्षमा ७ प्रतिशत आर्थिक वृद्धिदर हासिल गर्ने लक्ष्य राखेको छ ।

एडीबीका नेपाल निर्देशक आर्नो कुस्वाले कोभिड-१९ विरुद्धको खोप अभियानले नेपालको आर्थिक सुधारमा ठूलो सहयोग पुर्‍याउने बताए । मनसुन समेत राम्रो भएकाले कृषि क्षेत्रमा निकै सुधार आउने र त्यसले आर्थिक वृद्धिमा सहयोग पुर्‍याउने एडीबीले जनाएको छ ।

“यो वर्ष धेरै वर्षा भएका कारण कृषि क्षेत्रले आर्थिक वृद्धिमा योगदान गर्नेछ,” बैंकले प्रतिवेदनमा भनेको छ ।