भोजपुरको अरुण गाउँपालिका – ३ का ३ जना बालबालिका असार १० गते साँझ एक्कासि हराए । हराएको दुई दिनपछि उनीहरूको लास त्यहीकै एउटा माछा पोखरीमा भेटियो । रहस्मयरूपमा मृत्यु हुनेमा १४ र ८ वर्षका बालक र १३ वर्षकी बालिका थिए । उनीहरूको लासजाँच (पोस्टमार्टम) गर्दा मुखमा चुइँगमको बुझो भेटिएको प्रारम्भिक प्रतिवेदनमा जनाइएको थियो । ती बालबालिका निर्वाचन सुरक्षामा खटिएको नेपाली सेनाको टोली बसेको रेडक्रसको भवनतिर गएपछि हराएका थिए । महिना दिन पुग्दा घटनाका बारेमा यथार्थ जानकारी नपाउँदा सम्बन्धित परिवारका सदस्य थप पीडामा पर्नु स्वाभाविकै हो । स्थानीय जनतामा घटनाले आक्रोश उत्पन्न गरेको प्रतिध्वनि संसद्मा पनि सुनिएको छ । स्थानीय बासिन्दा अहिले आतंकित भएका बताइएको छ भने अझै अनुसन्धानमा अलमल र जालझेल भएमा तिनको आक्रोशको घेरा फराकिलो हुन पनि सक्नेछ ।
बालबालिकाको रहस्यमय मृत्युका बारेमा अनुसन्धानमा गम्भीर त्रुटि भएको आवाज उठ्न थालेको छ । व्यवस्थापिका संसद्मा यस विषयमा सांसद् कुमारी लक्ष्मी राईले निकै गम्भीर खुलासासहित प्रश्न उठाएकी छन् । सांसद राईले सरकारको ध्यानाकर्षण गर्दै अपराध अनुसन्धानका लागि लगिएको प्रहरीको कुकुर सैनिकहरू बसेको भवनतिर जान लाग्दा प्रहरीले रोकेको दाबी गरेकी छन् । सांसद राईको दाबी सत्य हो भने यस प्रकरणमा देशका दुईवटा सुरक्षा निकायको साख जोडिन पुगेको देखिन्छ । प्रहरीले सांसद राईको आरोपको आधिकारिक खण्डन गरेको छैन । नेपाली सेना प्रत्यक्षरूपमा विवादमा नतानिएकाले सेनाबाट यस विषयमा जानकारी नआएको हुनसक्छ । तर, स्थानीय बासिन्दा भने घटनाको अनुसन्धान निष्पक्ष र सक्रियतापूर्वक नगरिएको ठानेर आक्रोशित हुँदै गएका छन् । उनीहरूले स्थानीय तहमा आन्दोलन थालेका छन् र नारदमुनि थुलुङ राजमार्गमा केही घन्टा यातायात बन्दसमेत गरेका छन् ।
यस घटनामा सरकारले केन्द्रीय तहबाटै विशेष अग्रसरता देखाएर अनुसन्धान नगराउने हो भने स्थानीय जनतामा आक्रोश बढ्दै जानेछ । पक्कै पनि यातायात बन्द गरेर अपराधको अनुसन्धानमा सहयोग पुग्दैन र त्यसो गर्नु उचित पनि हुँदैन । तर, सरकारले यस्ता घटनाको अनुसन्धानलाई गम्भीरतापूर्वक नलिने हो वा जालझेल गर्ने हो भने जनताको आक्रोश थेग्न सजिलो हुनेछैन । त्यसमा पनि दुईवटा सुरक्षा निकायहरूको साख यस घटनामा जोडिन पुगेकाले सरकारको उच्च राजनीतिक नेतृत्व नै यसमा गम्भीर हुनुपर्छ । प्रहरीले अनुसन्धानका लागि लगेको कुकुरलाई सेनाको बिटमा जान रोकेको हो भने त्यो गम्भीर गल्ती हो । यद्यपि, कुकुर पस्दैमा अपराधी त्यहीँभित्र छ वा हुन्छ भनेर ठोकुवा गर्न मिल्दैन । तर, सन्देहको घेरा त्यसबाट केन्द्रित भने हुँदै जान्छ । प्याउलीका बासिन्दाको स्थानीय प्रहरी र प्रशासनबाट विश्वास भंग भइसकेको देखिन्छ । यसैले अनुसन्धानलाई विश्वसनीय बनाउन र अपराधीलाई सजाय दिलाउन सरकारले इमानसाथ सक्रियता देखाउनु आवश्यक छ । सरकारले इमानदार प्रयत्न गरेको विश्वास जनतालाई दिलाउन सकेमात्र स्थिति सामान्य हुनेछ र जनता आतंकित र आक्रोशित हुनेछैनन् । स्थानीय जनताले घटनाको अनुसन्धानमा केन्द्रीय टोली खटाउन गरेको माग पूरा गरेर सरकारले जनताको जिउधन रक्षाका लागि सरकार प्रतिबद्ध रहेको विश्वास दिलाओस् ।