काठमाडौं । नेपाल टेलिकमले आफ्नो सर्भर ह्याक नभएको जनाएको छ ।

गएको असार २७ गते सर्भर ह्याक भएको भन्ने सार्वजनिक भएपछि टेलिकमले एउटा सर्भर बन्द गराएर छानबिन गरेको थियो । विज्ञहरुबाट विस्तृत छानबिनका आधारमा टेलिकमको कुनै पनि डाटा चोरी नभएको पाइएको टेलिकमले जनाएको छ ।

“डाटा सुरक्षासम्बन्धी गाम्भीर्यता मनन गरी कम्पनीले शंकाको घेरामा रहेको उपकरण तत्काल बन्द गरी छानबिन सुरु गरेको थियो । कम्पनीका सम्बन्धित विज्ञहरुबाट विस्तृत छानबिनपश्चात् कम्पनीको कुनै पनि डाटा चोरी नभएको जानकारी गराउन चाहन्छौँ,” कम्पनीले भनेको छ ।

ग्राहकसँग सम्बन्धित डाटा सुरक्षित राख्न टेलिकमले विभिन्न सुरक्षात्मक संयन्त्रहरु अपनाउँदै आइरहेको प्रवक्ता राजेश जोशीले जनाएका छन् ।