काठमाडौं । पछिल्लो समय देशभर कोरोना संक्रमण र मृत्युदर बढ्दो छ । संक्रमण रोकथाम तथा नियन्त्रणका लागि ७७ मध्ये हालसम्म ७४ जिल्लामा निषेधाज्ञा जारी गरिएको छ ।

तीन जिल्लामा भने निषेधाज्ञा लागु गरिएको छैन । ती जिल्लामा कोरोना संक्रमित भने नभएका होइनन् । तर, दर न्यून छ । मनाङ, खोटाङ र तेह्रथुममा निषेधाज्ञा लागु गरिएको छैन ।

खोटाङका प्रमुख जिल्ला अधिकारी मित्रलाल शर्माका अनुसार जिल्लामा हालसम्म ११७ जनामा संक्रमण देखिएको छ । एकजनाको वृद्धको संक्रमणकै कारण मृत्यु भएको छ । तर, निषेधाज्ञा जारी गर्नुपरेको छैन ।

उनी भन्छन्, “सबैले स्वअनुशासन पालना गरिदिँदा निषेधाज्ञा लगाउनेतर्फ हामीले सोच्नुपरेको छैन । स्थानीय जनप्रतिनिधि, राजनीतिक दल, नागरिक समाज, सञ्चारकर्मी, व्यवसायी सबैको सकारात्मक सहयोग पाएका छौँ । त्यसैले हामीलाई निकै सहज भएको छ ।”

खोटाङमा राजनीतिक दल, नागरिक समाजलगायतसँग प्रशासनले निरन्तर छलफल र सुझाव लिने गरेको छ । स्थानीय तहले अनुमगनलाई तीव्रता दिएका छन् । सासंददेखि जनप्रतिनिधिले आफ्नो तहबाट हुने सहयोग गरिरहेका छन् ।

प्रमुख जिल्ला अधिकारी शर्माका अनुसार सीमामा कडाइ गरिएको छ । व्यवसायीले स्वतस्फूर्त रुपमा निश्चित समयमा पसल खोलेर सहयोग गरेका छन् । नयाँ व्यक्ति आएको अवस्थामा सम्बन्धित पालिकाको जिम्मा लगाएर त्यसको निरन्तर अनुगमन भइरहेको छ । वडास्तरसम्म प्रभावकारी रुपमा सबै सक्रिय छन् । जिल्लामा अक्सिजन प्लान्ट जडान गर्नेतर्फ पहल भइरहेको छ ।

शर्मा भन्छन्, “यो सामूहिक लडाइँ हो । हामी सामूहिक रुपमै जुटेका छौँ । मैले प्रत्येक दिन जनप्रतिनिधि, चिकित्सक, राजनीतिक दल, नागरिक समाजलगायतसँग आफैँ छलफल गर्छु । उहाँहरुका सकारात्मक सुझावलाई कार्यात्वयन गर्छौँ । जनस्तरबाट राम्रो सहयोग छ । यस्तै रहे हामी निषेधाज्ञातर्फ अगाडि बढ्दैनौँ ।”

तेह्रथुमका प्रमुख जिल्ला अधिकारी जयराज भण्डारी पनि सबैजना आत्मानुशासनमा बसेकाले जिल्लामा निषेधाज्ञा लगाउनु नपरेको बताउँछन् । जिल्लामा हाल १०७ जना सक्रिय संक्रमित छन् । एकजनाको मृत्यु भएको छ । उनका अनुसार जिल्लाका सीमामा कडाइ पारिएको छ । नाकामै हेल्थपोस्ट राखिएको छ । अत्यावश्यकबाहेकका काममा सबै जिम्मेवार देखिएका छन् ।

उनी भन्छन्, “महामारीविरुद्धको लडाइँ सबैको साझा हो । यसमा सबैको सहकार्य जरुरी छ । त्यसैले हामी सकेसम्म कानुनी रुपमा अगाडि बढ्न नपरोस भन्ने चाहन्छौँ । जनताको राम्रो सहयोग छ । यस्तोमा निषेधाज्ञा आवश्यक परेको छैन ।”

मर्दापर्दाको काममा प्रशासनले समन्वय गरिरहेको र स्थानीय तहको पनि राम्रो भूमिका रहेको उनी बताउँछन् । व्यवसायीले पनि प्रशासनको आग्रहलाई सकारात्मक रुपमा लिएर सहयोग गरेकाले पनि निषेधाज्ञा नलगाएरै आफूहरु अगाडि बढेको उनको भनाइ छ ।

मनाङका प्रमुख जिल्ला अधिकारी विष्णु लामिछाने पनि स्वास्थ्य मापदण्डको सबैले पालना गर्दा निषेधाज्ञा जारी गर्नु नपरेको बताउँछन् । उनका अनुसार मनाङमा हालसम्म ४६ जनामा कोरोना संक्रमण देखिएको छ । दोस्रो लहरमा कसैले ज्यान गुमाउनुपरेको छैन । अन्य जिल्लाबाट आउनेलाई अनिवार्य क्वारेन्टिन लागु गरिएको छ ।