बीबीसी । स्पेनमा एक व्यक्तिलाई जानीजानी २२ जनालाई कोरोना संक्रमित गराएको अभियोगमा पक्राउ गरिएको छ । ४० वर्षीय ती व्यक्तिलाई लगातार खोकी लाग्दा अनि १०४ डीग्री ज्वरो आइरहँदा पनि उनी काममा अनि जिम गइरहेका थिए । मेजोर्कास्थित आफू बस्ने टोलमा उनले मास्क तल झार्दै हिँड्ने गरेको र आफूसँग काम गर्ने सहकर्मीहरुलाई संक्रमित गराइदिन्छु भन्दै धम्क्याउने गरेको समेत बताइएको छ ।
यसरी उनको अफिसका पाँचजना र जिमका तीनजना कोरोना पोजेटिभ भएका हुन् । यसबहेक उनले आफ्ना परिवारका सदस्य सहित थप १४ जनालाई पनि कोरोना संक्रमित गराएको बताइएको छ ।
स्पेनिस प्रहरीले बताए अनुसार स्पष्ट लक्षण देखिरहँदा समेत ती व्यक्तिले काममा आउन छाडेनन् र खुलस्त रुपमा बाहिर हिँड्ने गरेका थिए ।
पछि उनले पीसीआर टेस्ट गराए तर नतिजा नआउँदै जिममा अनि काममा गइरहेका थिए ।
सहकर्मीहरुले घर जान अनुरोध गर्दा उल्टै मास्क फुकालेर खोक्दै, “म तिनीहरु सबैलाई कोरोना भाइरसले संक्रमित गराइदिन्छु ’ भनेर धम्क्याउने गरेको उनीसँगै काम गर्ने कर्मचारीले बताए । उनी वास्तवमै कोरोना पोजेटिभ भएपछि अफिसका सबै सचेत भएर बसेको बताइएको छ । प्रहरीले केही समय अगाडिदेखि नै यो घटनाबारे अनुसन्धान गरिरहेको थियो ।