काठमाडौं । ई–कमर्स पुनः सञ्चालनमा आएको छ । अत्यावश्यक सेवाअन्तर्गत तोकिएका औषधि, खाद्यवस्तु, इन्धन, खाना पकाउने ग्यास, तरकारी, फलफूल, दूध तथा दूग्धजन्य पदार्थ साथै प्याकेजिङका सामग्रीहरू मात्र होम डेलिभरी गरिएको मेरो किरानाका सागरदेव भट्टले जानकारी दिए ।
ई–कमर्स सञ्चालकहरुले अत्यावश्यक बाहेकका अन्य वस्तुहरूको होम डेलिभरी हुन नदिएर सर्वसाधारणका आवश्यकताहरु सहज, सुलभ र सुरक्षित तरिकाले परिपूर्ति गर्न प्रतिबद्ध रहेको जनाएको छ । अत्यावश्यकबाहेकका अन्य वस्तुहरुको होम डेलिभरी गर्ने कार्य कुनै ई–कमर्स सञ्चालकले गरेको पाइएमा सोको सम्बन्धित सञ्चालक नै जवाफदेही हुनुपर्ने पनि फोरमले जनाएको छ ।
भदौ ११ अत्यावश्यक बाहेकका अन्य सामानहरु डेलिभरी गरेको भन्दै केही डेलिभरी स्टाफ र ई-कमर्स सञ्चालकलाई प्रहरीले नियन्त्रणमा लिएको थियो ।
प्रहरीले निषेधाज्ञा अवधिभर होम डेलिभरी नदिने शर्तमा उनीहरुलाई छाडेको थियो । त्यसपछि ई-कमर्स सञ्चालकहरुसहितको जिल्ला प्रशासन कार्यालय काठमाडौंका प्रमुखको अध्यक्षतामा बसेको एक बैठकले सहायक प्रमुख जिल्ला अधिकारीको संयोजकत्वमा एक समिति गठन गरिएको थियो ।
उक्त समितिले ई-कमर्सबाट हुने कारोबारलाई कसरी सुरक्षित बनाउने भन्ने विषयमा मोडालिटीका बारे प्रतिवेदन दिने बताइएको छ ।
