बीबीसी । इजरायलमा पुरातात्विक खोजीका लागि स्वयमसेवकका रपमा काम गरेका एक युवाले ११०० वर्ष अगाडिका ४२५ वटा सुनका सिक्का जमिनमा गाडिएको अवस्थामा फेला पारेका छन् । ती सिक्काहरु इस्लामिक कालको भएको बताइएको छ ।
८४५ ग्राम तौलका ती सिक्काहरु ११०० वर्ष अगाडि पनि अहिले जत्तिकै मूल्यवान् भएको र आलिसान घर खरिद गर्न पर्याप्त रहेको विज्ञहरुले बताइएका छन् । त्यसैले पनि यति ठूलो सङ्ख्यामा सुनको सिक्का लुकाएको मान्छेले ११०० वर्ष अगाडि नै त्यसलाई फिर्ता लिन किन आएन भन्ने रहस्यमयी भएको बताइएको छ । किनकि सिक्का सो ठाउँबाट कतै नहराओस् भनेर त्यसलाई किलाले ठोकेर लुकाइएको छ ।
साथै यत्तिका वर्षसम्म किन कसैको नजरमा परेन भन्ने पनि स्पष्ट भएको छैन । यसबारे इजरायली पुरातात्विक निकायका प्रमुख लिआत नादभ जिभले भनेका छन्, “यति धेरै मात्रामा सुन फेला पर्नु अत्यन्तै दुर्लभ कुरा हो । विशेषगरी पुरातात्विक खोजीका बेलामा यस किसिमका बहुमूल्य वस्तु भेटाउनु लगभग असम्भव नै हुन्छ । किनकि सुनका वस्तुहरु प्रायः पगालेर भए पनि एकपछि अर्को पिँढीलाई हस्तान्तरण गर्ने चलन रहँदै आएको छ । ”
सुन पत्ता लगाउने युवाले पनि यो अनुभव नयाँ र अनौठो भएको उत्साहित हुँदै बताए । उनका अनुसार पहिले त उनले ती सुनका सिक्कालाई केबल रुखका पात ठानेका थिए र राम्ररी अध्ययन गरेपछि मात्र सुन भएको थाहा पाएका हुन् । सिक्का सम्बन्धी विशेषज्ञ रोबर्ट कुलले त्यसको अध्ययन गर्दा तिनमा ससाना कटाइ पनि फेला पारेका हुन् जुन त्यो समयको शाषनबारे जानकारी हासिल गर्न महत्वपूर्ण साबित हुने बताइएको छ ।