एजेन्सी । कोरोना महामारीका कारण पछिल्लो चार महिनादेखि बन्द रहेका मेक्सिको सिटीका चलचित्र हलहरु पुनःसञ्चालनमा आउन थालेका छन् । चलचित्र घरहरु सञ्चालनमा आएसँगै कोरोनाको कहरकाबीच पनि केही चलचित्र प्रेमीहरु हलमै गएर चलचित्र हेर्न थालेका छन् ।
चलचित्र प्रेमीहरुले फेस मास्क, शरीरको तापक्रम जाँच गराउनुका साथै स्यानिटाइज गरिएको कार्पेट पार गर्दै चलचित्र हेरेका छन् । अर्थात, सुरक्षाका सबै उपायहरु अपनाएर हलहरु पुनः सञ्चालनमा आएका हुन् । सुरक्षाका उपायमध्ये सबैभन्दा ठूलो कुरा भौतिक दूरीलाई पनि पालना गरिएको छ ।
हलका सिटमा सँगै आएका २-२ जनामात्रै सँगै बस्ने मिल्ने गरी सिटको व्यवस्था गरिएको छ । दुई सिटपछि ठूलो 'ग्याप' सहित अर्को दुई सिट बस्न मिल्नेगरी व्यवस्था गरिएको छ । यसरी एक हलभित्र मात्रै ३० प्रतिशतको क्षमताको व्यवस्था गरिएको छ ।
चलचित्र हलहरु खुल्न थाले पनि दर्शकको उपस्थिति भने अहिले न्यून नै देखिएको छ । बुधबार मेक्सिको सिटीको आईएमएएक्स हलमा १० जना मात्रै दर्शक चलचित्र हेर्न आएका थिए ।
उनीहरुले २०१४ मा रिलिज भएको अन्तरिक्ष नाटक इन्टरस्टेलर चलचित्र हेरेका थिए । कोरोना महामारीले निम्त्याएको बन्दाबन्दीले गर्दा लामो समय छायांकन र रिलिज ठप्प भएका कारण मेक्सिको सिटीका हलहरुले पुराना चलचत्रिहरु पुनः रिलिज गरी दर्शकलाई फेरि पहिलेका 'क्लासिक' चलचित्रको स्वाद दिलाउने वातावरण सिर्जना गरिरहेका छन् ।
चार महिनापछि हलमा चलचित्र हेर्न पुगेका माटियाज मोरा भन्छिन्,“चलचित्र घरमा फेरि फर्किन पाँउदा खुसी महसुस भएको छ । मेरो लागि चलचित्र हेर्ने सहि तरिका भनेको हलको पर्दामा हेर्नु मात्रै हो ।”
यस्तै ४७ वर्षीय एन्टोनियो एलामिलो र ४२ वर्षीय नलिदा कार्टुजानो पनि चार महिनापछि सन् १९५५ मा रिलिज भएको जेम्स डिनको क्लासिक चलचित्र ‘क्लासिक रिबेल विथआउट अ कज’ हेर्न हल पुगेका थिए ।
“कोरोनाको कहरपछि हलहरु बन्द हुनुको अन्तिम दिन पनि म यहाँ थिएँ भने शुक्रबार हल पुनः खुल्दा पहिलो शो हेर्ने पहिलो दर्शक पनि म बनेको छु । म चलचित्र बिना बाँच्न सक्दिन ।”
चीन, भारत र अमेरिकापछि मेक्सिको चौथो चलचित्रको ठूलो बजार हो । मेक्सिकोका हलहरुले ३५० मिलियन टिकटहरु बिक्री गर्ने गर्दछन् । राजस्वको हिसाबमा, ३५० मिलियन डलर टिकट विक्रीका दरले मेक्सिको नवौं स्थानमा छन् । अन्य देशमा भन्दा मेक्सिकामा चलचित्रहलको टिकट मूल्य न्यून छ ।
महामारीका कहरकाबिच,मार्च २५ देखि अगस्ट १० सम्ममा १५२ मिलियन टिकट विक्री गुमाएको र देशभरका दर्जनौं चलचित्र घरहरु स्थायी रुपमा बन्द हुने घोषणा गरेको, चलचित्र थिएटर व्यापार कक्ष क्यानासिनले अनुमान गरेको छ ।
मेक्सिकोका संस्कृति सचिव एलेजेन्ड्रा फ्रास्टो भन्छन्,“ यस प्रकारणको समयमा चलचित्रहरुमा फर्किनु असम्भव प्राय देखिन्थ्यो । तर वास्तवमा यो असम्भव लाई सम्भव बनाउन सक्ने शक्ति ‘कला’मा छ ।”
मेक्सिकोले बिहिबारसम्म कोरोनाभाइरस संक्रमणको संख्या पचार लाख पार गरिसकेको छ । स्वास्थ्य विभागका अनुसार, शुक्रबारसम्म सात हजार ३७१ नयाँ संक्रमित सहित संक्रमितको संख्या जम्मा ५ लाख ५ हजार ७५१ पुगेको छ भने संक्रमणका कारण मृत्यु हुनेको संख्या ५५ हजार २९३ को कोरोनाका कारण मृत्यु भइसकेको छ । - इन्डियन एक्सप्रेस