काठमाडौं । सरकारले कोरोना भाइरसको संक्रमितको उपचारका लागि सात हजार आइसोलेसन बेड थप गर्न ३८ करोड रुपैंया विनियोजन गरिएको छ ।
स्वास्थ्य तथा जनसंख्या मन्त्रालयका प्रवक्ता डा.जागेश्वर गौतमले सातै प्रदेशमा कोरोना संक्रमितको उपचारका लागि थप सात हजार बेडका लागि ३८ करोड रुपैंया विनियोजन गरेको जानकारी दिए ।
उनका अनुसार प्रदेश २ र प्रदेश ५ का लागि ७-७ करोड रुपैंया विनियोजन भएको छ भने सुदूपश्चिम प्रदेश र कर्णाली प्रदेशका लागि ६-६करोड रुपैंया, गण्डकी प्रदेश, बागमति र प्रदेश १ लाई ४-४ करोड प्रदेशगत वितरण गरिएको जानकारी दिए ।
त्यसैगरी २५ हब अस्पताल र २० शिक्षण अस्पतालले एक-एक विशेषज्ञ चिकित्सक सहितको टिम तयारी अवस्थामा राखेको उनले बताए ।
कोरोना संक्रमितसँग सम्पर्कमा आएकाहरु खोजपड्तालका लागि गाउँपालिकामा एक जना, नगरपालिकामा दुई जना, उपमहानगरपालिकामा तीन र महानगरपालिकामा पाँच जना गरी प्रत्येक टिममा तीन जना स्वास्थ्यकर्मीको टिम गठन भएको उनले बताए । उनका अनुसार देशैभर कोरोना संक्रमित खोज्न एक हजार ७५ टिम परिचालन भएको छ ।