काठमाडौं । नोभेल कोरोना भाइरसको संक्रमणबाट हुने कोभिड-१९ अहिलेसम्म घोषणा गरिएका स्वास्थ्य आपतकालमध्येकै 'सबैभन्दा गम्भीर स्वास्थ्य संकट' भएको विश्व स्वास्थ्य संगठन (डब्लूएचओ) ले बताएको छ ।
डब्लूएचओका प्रमुख डा. टेड्रोस एड्हानोम गेहब्रेयससले महामारीबारे समीक्षा गर्नका लागि डब्लूएचओको आपत्कालीन समितिको बैठक यही साता फरि बोलाउने बताएका छन् ।
यसअघि विश्व स्वास्थ्य संगठनले अन्य पाँचवटा स्वास्थ्य आपतकाल घोषणा गरिसकेको छ । जसमा इबोलाका लागि दुई पटक, जीका, पोलियो र स्वाइन फ्लुको संक्रमणको समय रहेका छन् ।
गत जनवरीमा 'विश्वव्यापी स्वास्थ्य आतपकाल' घोषणा गरिएयता विश्वभरि एक करोड ६० लाखभन्दा बढी व्यक्ति संक्रमित भइसकेका छन् भने साढे ६ लाखभन्दा बढी मानिसको संक्रमणबाट मृत्यु भएको छ ।
"जनवरी ३० मा मैले जनस्वास्थ्यमा अन्तर्राष्ट्रिय आपतकालको घोषणा गर्दा चीनबाहिर सयवटा मात्रै कोरोना भाइरस संक्रमण देखिएको थियो, मृत्यु भएकै थिएन," डब्लूएचओ प्रमुख टेड्रोसले भने, "कोभिड-१९ ले हाम्रो विश्वलाई बदलिदिएको छ । त्यसले मानिसहरूलाई, समुदायहरूलाई र देशहरूलाई एकसाथ ल्याइदिएको छ र उनीहरूलाई अलग पनि पारिदिएको छ ।"
विगत ६ हप्तामा कुल संक्रमितको संख्या दुई गुणाले बढेको उनले बताए । कोरोनाभाइरससँग जुध्नका लागि विश्वले ठूलो प्रयत्न गरिरहे पनि "अझै धेरै गर्न बाँकी रहेको" टेड्रोसले बताए ।
विश्व स्वास्थ्य सङ्गठनको आपत्कालीन कार्यक्रमका निर्देशक माइक रायनले फेरि संक्रमण फैलिएका देशहरूमा थप लकडाउन गर्न आवश्यक पर्नसक्ने बताए । तर, सम्भव भएसम्म छोटो समयका लागि र निश्चित भूगोलका लागि हुनुपर्ने उनीहरूको सुझाव छ । - बीबीसी
