हङकङ । चीनले हङकङका लागि राष्ट्रिय सुरक्षा कानुन लागु गरेको चार दिनपछि नयाँ सुरक्षा प्रमुख पनि नियुक्त गरेको छ । चीनले नयाँ सुरक्षा प्रमुखमा 'हार्डलाइनर' चेङ याङसेङलाई नियुक्त गरेको बीबीसीले जनाएको छ ।
चीनको दक्षिणी क्षेत्र वुकानमा भएको भूमि विवादपछि उत्पन्न आन्दोलनलाई दबाउन उत्कृष्ट भूमिका खेलेकोले अहिले हङकङको सुरक्षा प्रमुखको रुपमा पठाइएको बीबीसीले जनाएको छ ।
गुआन्जोङ प्रान्तका कम्युनिस्ट पार्टी कमिटीका जनरल रहेका चेङ सन् २०११ मा वुकान सहरमा भएको भूमि विवादको प्रदर्शनलाई निस्तेज पार्न सफल भएको व्यक्तिको रुपमा परिचित छन् ।
सरकारले स्थानीयमा गुनासाहरु नसुनेको र बल प्रयोग गरेको भन्दै स्थानीयहरुले केही अन्तर्राष्ट्रिय मिडियामार्फत उनको आलोचना गरेका थिए । त्यसको प्रतिक्रियामा उनले अन्तर्राष्ट्रिय मिडियाहरु चीनमा आन्दोलन भएकोमा खुसी हुने र रमाउने गरेको टिप्पणी गरेका थिए ।
यसअघि लागु गरिएको सुरक्षा कानुनलाई लागु गराउन उनलाई मुख्य जिम्मेवारी सुम्पिएको बताइएको छ । तर, हङकङमा प्रजातन्त्र पक्षधरहरुले भने हङकङको स्वतन्त्रताको अन्त्य गरेको बताउँदै आएका छन् ।
नयाँ सुरक्षा कानुनको विश्वभरबाट विरोध भइरहेको छ । उक्त कानुन लागु भएसँगै केही प्रजातन्त्र पक्षधरहरुलाई उनीहरुको भूमिकाबाट बर्खास्त गरिएको छ । जसमध्येका स्थानीय सांसद र पूर्व विद्यार्थी नेता नाथन लले हङकङ छोडेका छन् ।
बुधबार कानुन लागु भएको भन्दै विरोधमा उत्रिएकाहरुलाई प्रहरीले सयौंलाई नियन्त्रणमा लिएको छ ।
